Túrkistandyq oqýshylardyń qurastyrǵan robottary qalamgerlerdi tánti etti
Ónertapqysh oqýshylardyń kórmesin tamashalaǵan Nur-Sultan, Almaty qalalarynan kelgen qalamgerler men bas redaktorlar jas órenderdiń qadamyn oń baǵalap, tańdanystaryn jasyra almady. Maǵynaly kezdesýdi Keles aýdanynyń ákimi Aqmentaı Esbaev ashyp berdi.
«Keles aýdanynda 63 bilim uıasynda 33 myńǵa jýyq oqýshy bilim alyp jatyr. Qosymsha bilimmen qamtylǵan balalar sany 12000-nan assa, qosymsha úıirmelerge tartylǵan balalar sany 7500-ge jetti. Kezinde Toqash Berdııarov, Zııabek Rústemov, Nemat Kelimbetov, Zákir Asabaev taǵy basqa tulǵalarǵa tuǵyr bolǵan qasıetti Keles aldaǵy ýaqytta da ultyn súıetin ulandardyń ordasyna aınalary sózsiz. Bul is-shara oqýshylardyń damýyna, oı-órisiniń keńeıýine oń serpin beredi», - dedi aýdan ákimi.
Abaı tórindegi kezdesýge Keles, Shardara, Qazyǵurt, Jetisaı, Maqtaaral jáne Saryaǵash aýdandarynyń oqýshylary men ustazdary qatysty. Olarǵa elge tanymal qalamgerler men BAQ basshylary aqyl-keńesterin aıtyp, túrli suraqtarǵa jaýap berdi. Sonymen birge oqýshylarǵa «Ulan», «Aq jelken» jáne «Baldyrǵan» balalar basylymdary taratyldy.
Jıynda «Jas órken» JShS-niń bas dırektory Júsipbek Qorǵasbek óz sózinde Japonııadaǵy bala tárbıesine toqtalyp ótti.
«Japonııada sábı kútip júrgen kelinshekti kitaphanaǵa barýǵa mindetteıdi eken. Maqsat - balany qursaǵynda jatqan kezden bastap kitap oqýǵa qyzyqtyrý» dese, «Balapan» telearnasynyń bas prodıýseri Sandýǵash Baımahanqyzy telearnada balalar men jasóspirimderdiń dúnıetanymyn arttyratyn jobalar kóbeıip kele jatqanyn aıtty. Al ulttyq aýdarma bıýrosynyń ókili, aqyn, jýrnalıst Eseı Jeńisuly qazirgi balalardyń tárbıesine qatysty mańyzdy máselelerge toqtaldy.
«Osyndaǵy árbir oqýshy erteń ata-ana bolady. Olar tym bolmasa ózderiniń ul-qyzdary suraq qoıǵanda jaýap bere alatyndaı bilimdi bolsynshy. Qazir álemde tórtinshi ındýstrıaldyq revolıýtsııa júrip jatyr. Ol ne? Damyǵan elder qataryna qosylý úshin ne isteý qajet? Mine, osy suraqtarǵa jaýap izdeý, uly mindetterdi oryndaý - sender sııaqty órenderdiń qolynda»,- dedi Eseı Jeńisuly.
Jıynda «Baldyrǵan» jýrnalynyń bas redaktory Dúısenbek Maǵlumov, jazýshy Aıagúl Mantaı, «Aıqyn» gazeti bas redaktorynyń birinshi orynbasary Serikbol Hasan jáne «Ulan» gazetiniń bas redaktory Jadyra Narmahanova, jazýshy, dramatýrg Álibek Baıbol syndy qalamgerler oqýshylardyń suraqtaryna jaýap berip, pikir almasty. Óz óleńderin oqyp, erkin pikir almasqan oqýshylar qalamgerlermen sýretke tústi. Túrli aýdandardan kelgen ustazdar men shákirtter osyndaı kezdesýler jıi ótip tursa degen tilekterin jetkizdi.
Kezdesý sońynda oqýshylarǵa «Saq» kıonstýdııasy túsirgen «Túrkistan» anımatsııalyq fılmi kórsetildi.
Mádenıet úıindegi kezdesýden keıin qalamgerler "Jas Túrkistan-2019" respýblıkalyq balalar shyǵarmashylyq marafonyn uıymdastyrǵan Túrkistan oblysy ákimdigine rızashylyqtaryn bildirip, bul joba dástúrge aınalatynyna senim bildirdi.