Túrkistandyq muǵalimder kúndelik toltyrý úshin jol boıynda ınternet qýalap júr

Tsıfrlyq damý, ınnovatsııalar jáne aeroǵarysh ónerkásibi mınıstrligi Túrkistan oblysynda muǵalimderdiń elektrondy kúndelik toltyrý úshin dala kezip júrgeni beınelengen sýretke pikir bildirdi, dep habarlaıdy QazAqparat tilshisi.

Mınıstrliktiń málimetinshe, sýret Túrkistan oblysynyń Qazyǵurt aýdanyna qarasty Aqqum aýylynda túsirilgen. Oblystyq ákimdik usynǵan aqparatqa qaraǵanda, bul aýylda 432 adam turady. Aýyl turǵyndaryna «Ksell» kompanııasy uıaly baılanystyń 2G jáne mobıldi ınternettiń 3G býyny boıynsha qyzmet kórsetedi.

Degenmen, Túrkistan oblysynyń ákimdigi baılanys operatorymen birge aýyldardaǵy ınternet qyzmetterin jaqsartý jáne qamtamasyz etý jónindegi jol kartasyn ázirlep jatyr. Atalǵan jol kartasyna Aqqum aýyly da kiredi.

«Osy jol kartasy aıasynda baılanys sapasyn jaqsartý úshin antenna-dińgek qurylysyn salý josparlanǵan. Sodan keıin baılanys operatory - «Ksell» AQ bazalyq stansa ornatady. Baılanys operatorynan bazalyq stansa ornatýdyń naqty datasyna qatysty aqparat kútilip otyr. Buǵan qosa, mınıstrlik baılanys salasynda «Qoljetimdi ınternet» ulttyq jobasyn ázirledi. Atalǵan joba aıasynda Aqqum aýylyn qosa alǵanda 3 myńnan astam eldi mekendi talshyqty-optıkalyq baılanys jelisi qyzmetimen qamtamasyz etý jónindegi is-shara qarastyrylǵan», - dep atap ótti mınıstrlikten.