Túrkistandyq kúre jol boıynan túıequs pen taýystardyń zoobaǵyn ashpaq
Jergilikti turǵyn Nálipan Myrzaqulov óz aýlasynda Qazaqstanda sırek kezdesetin qustyń osy túrin ósirýde. Ázirge balapan kezinen baǵyp-qaqqan 17 bas qusy bar, dep habarlaıdy QazAqparat HAA tilshisi.
Sharýanyń sózinshe qanattylar jabaıy bolǵanymen, Túrkistanǵa tez jersingen. Shóldi jerlerde de tózimdilik tanytady. Jem-shóbin ýaqytyly berse, paıdasy da kól-kósir. Jumyrtqasynyń bir danasy 5 myń men 10 myń teńge shamasynda saýdalanady. Mamandardyń sózinshe, bir jumyrtqamen 20 adamdy toıdyrýǵa bolady. Holesterınsiz eti júrek aýrýyna da paıdaly eken. Bul qustar shamamen 40-50 jyldan astam ómir súretindikten turaqty kásipke arqaý. Sondyqtan shaǵyn bızneske tek Myrzaqulovtar otbasy ǵana emes, Túrkistan jurty qyzyǵýshylyq bildirgen. Qazir jaqsy isti kórýge kelýshiler kóbeıgen.
Nálipan Myrzaqulovqa sharýasyn dóńgeletý úshin Túrkistannan Otyrarǵa barar jol boıynan 10 sottyq jer telimi memleket tarapynan berilgen. Munda túıequstardan bólek, 10 taýys ósiriledi. Azamattyń jospary aıqyn. Kúre jol boıynan arnaıy zoobaq ashyp, qazaq balasyna tańsyq kásipti odan ári damytqysy keledi. Erekshe tirshilik ıesiniń tuqymyn kóbeıtip, ony kásip kózine aınaldyrǵysy bar. Alaıda, bul sharýashylyqqa memleketten qoldaýdyń bolmaýy qolbaılaý eken.
«Memleketten taýyqqa, úndikke jáne jumyrtqaǵa sýbsıdııa beriledi eken. Al osy túıequsqa kelgen kezde sýbsıdııa joq. Biz bul sharýashylyqty damytqymyz-aq keledi. Biraq oǵan memleketten kómek bolsa deımiz», - deıdi Nálipan Myrzaqulov.