Túrkistandyq kásipker 2 mln teńgeniń et ónimderin elge taratty

TÚRKІSTAN. QazAqparat - Elimizde «Nur Otan» partııasynyń bastamasymen «Biz birgemiz!» aktsııasy jalǵasýda. Koronavırýs indetine qarsy kúresti kúsheıtý, kómekke muqtaj turǵyndardy qoldaý maqsatynda qolǵa alynǵan aktsııaǵa janashyr azamattar atsalysýda, dep habarlaıdy QazAqparat «Nur Otan» partııasy Túrkistan oblystyq fılıalynyń baspasóz qyzmetine silteme jasap.

Túrkistan oblysynyń kásipkeri, «Ordabasy qus» JShS-niń dırektory, bastaýysh partııa uıymynyń tóraǵasy Murat Taǵaev ta aıryqsha úles qosyp, 2800 keli kúrketaýyq eti ónimimen demeýshilik kórsetti.

«Memleket tarapynan qaýipti indetti taratpaý, turǵyndardyń ál-aýqatyn kóterý úshin aýqymdy jumys atqarylyp jatyr. Degenmen mundaı kezeńde árbir azamat qoldan kelgenshe elge kómektesýi kerek dep esepteımin. Biz bul qıyndyqty birlik pen tártip arqyly jeńemiz», – deıdi Murat Taǵaev.

Іsker azamat kúrketaýyq etinen ázirlengen shujyq jáne ózge de ónimderdi partııalyq jobalar aıasynda turmysy tómen turǵyndarǵa taratý úshin «Biz birgemiz!» aktsııasynyń úılestirýshilerine usyndy. Jalpy ónimniń quny 2 mln. teńgeni quraıdy. Partııa ókilderi men volonterler, «jasotandyqtar» bul etti aýdan, qalalarda tizimdegi otbasylarǵa aparyp bermek.

Ordabasy aýdany, Badam aýylynda ornalasqan «Ordabasy qus» JShS búginde Qazaqstannyń birneshe óńirin kúrketaýyq etimen qamtyp otyr. Ónim kólemi de ulǵaıyp keledi. Osy kásiporyndy basqaratyn Murat Taǵaev buǵan deıin de qaıyrymdylyq aktsııalaryna úles qosyp, demeýshiligimen tanylǵan. Metsenat azamat, «Nur Otan» partııasynyń múshesi Murat Taǵaevqa jurtshylyqtyń alǵysy mol.