Túrkistandyq erli-zaıypty laıdan tandyr pesh jasaýdy kásipke aınaldyrdy
Tımýrdyń bul kásipti qolǵa alǵanyna alty jyldyń júzi bolǵan. Ol bir kúnde 10-nan asa tandyr qalybyn jasaıdy. Jumysy sapaly shyǵýy úshin sary, qyzyl topyraqty paıdalanady. Sý aralastyryp, ábden ıleıdi. Keıin qalypqa salyp, tandyr peshti daıyndaıdy. Laıdan jasalǵan tandyr 5-6 kún boıy kún astyna kebýi qajet. Sodan soń saýdaǵa shyǵarylady.
«Qolda bardy uqsatyp, is qylsa, eshkim eshkimge alaqan jaımaıdy. Tabystyń kózi – eńbekte» - deıdi Tımýr.
Jalpy usta bir aıda 360 tandyr peshin jasap, saýdaǵa shyǵarady. Bireýiniń baǵasy 6 myń teńgeden bastalyp, sapasyna qaraı 100 myń teńgege deıin joǵarylaı beredi.
Tımýrǵa jubaıy Bıbigúl de kómektesedi. Onyń aıtýynsha, pesh jasaýdyń ózindik qyr-syry, qıynshylyǵy bar.
«Tandyr pesh jasaýdy qaıyn atamyz Ózbekstannan úırenip kelgen. Keıinnen ol kásipti úıdegi otaǵasy, bala-shaǵamyzben úırenip aldyq. Qazir kúnkóris tabysymyzǵa aınaldy. Árıne, bul jaz mezgilinde ǵana atqarylatyn sharýa. Sondyqtan bar kúshimizdi salamyz. Kúnine 10-12 tandyrǵa deıin jasaımyz. Keıde tapsyrys kóbeıgen kezde 1 aıda 150-200 danasyn jasap shyǵaramyz. Ár apta saıyn kúıeýim olardy bazarǵa alyp shyǵady», – deıdi ol.
Qazirgi tańda kásipker otbasynyń qolynan shyqqan peshti tutynýshylar kóp. Bastapqyda tek Keles aýdanyndaǵy eldi meken turǵyndary satyp alatyn bolsa, búgingi kúni Shardara, Jetisaı, Maqtaaral, Saryaǵash aýdandarynan arnaıy izdep keletinder bar.
Sondaı-aq erli-zaıypty aýyldan naýbaıhana ashqan. Ózderi jasaǵan tandyr peshte kúnine 200-den asa nan pisirip, satady. Qazirgi kezde 4 adamdy turaqty jumyspen qamtyp otyr.
Kásipker otbasy 2021 jyly naýryz aıynda «Eńbek» nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan memlekettik baǵdarlamasy aıasynda grant jeńip alǵan. Endi aldaǵy ýaqytta 2,5 paıyzdyq nesıe alyp, ekinshi naýbaıhana ashýdy josparlap otyr.