Túrkistandyq dıqandar tikeleı sebý ádisimen kúzdik astyq egýdi bastady

TÚRKІSTAN. QazAqparat – Túrkistan oblysynyń dıqandary tikeleı sebý ádisimen 168 myń ga alqapqa kúzdik astyq egýdi bastady. No-till tehnologııasyn qoldanǵan óńirde daqyldardyń túsimdiligi eki esege artqan, dep habarlaıdy QazAqparat tilshisi.

Aýyl sharýashylyǵy salasynda jańa tehnologııalardyń paıdalanylýy jaıynda Qazyǵurt aýdanyna qarasty «Sharbulaq» aýyldyq okrýginde semınar-keńes uıymdastyrylyp, basqosýǵa oblys ákimi Ómirzaq Shókeev pen agrobıznes ókilderi, aýdan-qala ákimderi men sharýalar qatysty.

Ashyq aspan astynda ótken jıynda súr tanapta qaldyrmaı tikeleı sebý ádisterin álemniń damyǵan elderi, atap aıtqanda AQSh, Kanada, Brazılııa, Argentına elderiniń sharýalary keńinen paıdalanaıyny sóz boldy.

Mamandardyń sózinshe, sońǵy jyldary kóp elderde noldik tehnologııany paıdalaný arqyly ósiriletin egistiktiń kólemi artyp keledi. Aıdalmaǵan jerge daqyldardy tikeleı sebý Qazaqstannyń soltústik aımaqtarynda da, ásirese shóleıtti, sý jáne jel erozııasyna ushyraǵan jerlerde, dándi daqyldardy noldik tehnologııamen ósirýdiń tıimdiligi dáleldendi.

«Jańa tehnologııalarǵa mindetti túrde kóshýimiz kerek. Óıtkeni myna básekelestik zamanda dástúrli tehnologııa alysqa aparmaıdy bizdi. Biz kiriseıik endi osyǵan. Noldik tehnologııany óte belsendi qolǵa alyp jatqan sharýa qojalyqtary bar. Bul jerde batyldyq kerek. Bizde bir jaqsy jeri 5 myń gektarlyq alqaptar, ol úlken emes. Elimizde aldy mıllıon gektarǵa deıin egetin oblystar bar»,-dedi Ómirzaq Shókeev.

Jıynda oblystyq aýyl sharýashylyǵy basqarmasynyń basshysy Nurbek Badyraqov Qazaqstandaǵy maqtany satyp alý baǵasynyń bekitilýin jarııalady.

Óńirdegi 18 maqta óńdeıtin kásiporyn shıtti maqtanyń tonnasyn 130 myń teńgeden qabyldaýdy bastady.

Іrilengen agroqurylymdar úshin shıtti maqta baǵasy áli de ósedi dep kútilýde.