Túrkistandyq depýtattar Maqtaaralǵa gýmanıtarlyq kómek jetkizdi
Óńirlik kommýnıkatsııa qyzmetinen málim etkendeı, 11 júk kóligine tıelgen gýmanıtarlyq kómektiń jalpy quny 11 mln teńgeni quraıdy. Onyń ishinde azyq-túlik, kórpe-tósek, kıim keshek, gıgıenalyq zattar men 2 tonna balyq eti bar.
Túrkistan oblystyq máslıhatynyń fraktsııa jetekshisi Murat Tóltebaev bastaǵan gýmanıtarlyq kómek kerýenine bir top depýtat ilesip bardy.
«Búgin bizder «Nur Otan« partııasynyń «Biz birgemiz« aktsııasy aıasynda Maqtaaral aýdanyndaǵy tasqyn sýdan zardap shekken turǵyndarǵa qol ushyn sozýdy jón kórdik. Bul - bizdiń azamattyq paryzymyz dep sanaımyz. Osyndaı qıyn-qystaý kezeńde, ásirese qasıetti Ramazan aıynda maqtaaraldyqtarǵa qoldaý kórsetý - saýapty is. Osyny eskergen Túrkistan oblystyq máslıhatynyń bir top depýtaty gýmanıtarlyq kómek kórsetip, mundaǵy eldiń búgingi jaı-kúıimen tanysý úshin arnaıy kelip otyr», - dedi halyq qalaýlysy Sháripbek Jamalbek.
Kómek kerýenin bastap kelgen depýtattardy kútip alǵan Túrkistan oblystyq «Nur Otan» partııasy tóraǵasynyń birinshi orynbasary Beısen Tájibaev el aǵalaryna alǵys bildirip, búgingi tańda shtab qoımasyna 270 tonnadan astam azyq-túlik jınalǵanyn aıtyp ótti.
«Qazirgi tańda shtab qoımasy toqtaýsyz jumys istep tur. Búginde munda 270 tonnadan astam azyq-túlik taýarlary men kórpe-tósek, kıim keshek, gıgıenalyq zattar jınaqtaldy. Budan bólek taǵy eki qoıma ázirlenip, turǵyndarǵa kerekti zattardyń bári jetkizilýde. Qabyldap alý men taratyp berý isi júıelenip, tek suranysqa saı tizim arqyly úlestirilýde», - dedi Beısen Dáýletuly.
Munan soń depýtattar evakýatsııa oryndaryna jaıǵasqan turǵyndarmen kezdesip, olardyń búgingi tynys-tirshiligimen tanysyp shyqty. Sondaı-aq, olar halyqtyń kókeıindegi saýaldarǵa jaýap berip, memleket tarapynan kórsetiletin kómek túrlerin jan-jaqty baıandap berdi.
Aıta keteıik, búginge deıin shtab qoımasynan maqtaaraldyq turǵyndarǵa 90 tonnadan astam azyq-túlik pen kıim-keshek, jeke bas gıgıenasyna qajetti taýarlar berildi.