Túrkistandyq depýtattar apat aımaǵyna 30 tonna qajetti zattar jóneltti

MAQTAARAL.QazAqparat -Túrkistan oblystyq máslıhatynyń jáne barlyq aýdandyq, qalalyq máslıhattardyń depýtattary sý tasqyny bolǵan aımaqqa 30 tonnalyq gýmanıtarlyq kómek jóneltti. «Nur Otan» partııasynyń «Biz birgemiz» respýblıkalyq aktsııasy aıasynda maqtaaraldyq turǵyndarǵa 7 birdeı júk kóligine tıelgen azyq-túlik joldady, dep habarlaıdy QazAqparat tilshisi.

Atalǵan qaıyrymdylyq sharasyn uıymdastyrýǵa Túrkistan oblystyq máslıhatynyń hatshysy Qaırat Balabıevtiń ózi uıytqy bolǵan.

Atalǵan kerýendi shyǵaryp salý sharasyna oblys ákimi Ómirzaq Shókeev arnaıy qatysyp, osyndaı qysyltaıań ýaqytta maqtaaraldyqtarǵa kómek qolyn sozǵan azamattarǵa alǵysyn bildirdi. Aımaq basshysy sondaı-aq búgingi tańda Maqtaaral aýdanynda tasqyn sýdyń betin qaıtarý boıynsha atqarylyp jatqan jumystar barysyn baıandady.

«Apat aıtyp kelmeıdi. Maqtaaral aýdanynda dál qazirgi ýaqytta qaýiptiń beti qaıta bastady. Atalǵan aýdanda myńǵa jýyq maman jumys istep jatyr. 3,5 myńnan astam turǵyn evakýatsııa oryndaryna jaıǵastyrylǵan. Olarǵa biz barlyq tıisti kómekterdi kórsetýimiz qajet. Osy rette eldiń sonyń ishinde depýtattardyń osyndaı bastama kóterip, halyqqa bolysýy kóńil qýantady. Eń bastysy – halyqqa sabyr men tózimdilik qajet. Aldaǵy ýaqytta tasqyn sýdan kelgen shyǵyndar tolyq eseptelip, jańa úıler boı kóterip, joldar jóndelip qalypty ómir bastalatynyna senimdimiz», – dedi Ómirzaq Shókeev.

Aıta keteıik, jalpy sommasy 21 mln teńge bolatyn kerýeninde azyq-túlik taýarlarynan bólek, kıim-keshek, jeke bas gıgıenasyna arnalǵan taýarlar bar. ıAǵnı, kerýende 11,7 tonna un, 2,9 tonna kúrish, 3,6 tonna qant, 2,8 tonna makaron, 1,5 tonna et, 900 keli jýyq sút ónimderi, 2,8 tonna kartop, 1,7 tonna pııaz, 1,3 tonna sábiz jáne taǵy basqa da azyq-túlik ónimderi tıelgen. Atalǵan kerýen túsaýa Maqtaaral aýdany Atakent kentinde ornalasqan arnaıy qoımaǵa kelip jetedi dep kútilýde.