Túrkistandyq 40-qa jýyq memlekettik qyzmetshi bir kúnin túrmede ótkizdi
Túrkistan oblysynyń laýazymdy qyzmetkerleri QR ІІM Qylmystyq-atqarý júıesi komıtetiniń №69 túzetý mekemesine bardy. Sheneýnikter sottalýshylardyń temir tordyń ar jaǵyndaǵy ahýalymen tanysty. Qamaýdaǵy jaǵdaıdy óz kózderimen kórdi.
Erekshe shara sheneýnikter arasyndaǵy «barmaq basty, kóz qysty» áreketterdiń aldyn-alý úshin uıymdastyryldy. Maqsat – memlekettik qyzmetshilerge sybaılas jemqorlyq qylmysy úshin jazanyń qalaı óteletinin tikeleı tanystyrý arqyly jemqorlyqtyń aldyn alý. Para alǵannyń barar jeri abaqty ekenin uǵyndyrý.
Qatań rejımdik baqylaý ızolıatoryna memlekettik mekeme basshylary men olardyń orynbasarlary, aýdan, qala ákimderiniń orynbasarlary, jalpy 40-qa jýyq adam arnaıy avtobýspen jetkizildi. Sybaılas jemqorlyq qylmystary saldary boıynsha memleketik qyzmetshilerdiń sanasyna áser etý kózdelgen bul sapar barysynda túzetý mekemesiniń basshylyq quramy memlekettik qyzmetshilerge túrmedegi jaǵdaıdy kórsetti. Memlekettik qyzmetkerler sottalýshylardyń jatatyn jeri, tergeý ızolıatory, jeke kamera, ashana men aýlalaryn aralap kórdi.
«Mundaı sharalar sybaılas jemqorlyqtyń deńgeıin tómendetýge áser etedi», - deıdi mamandar.
Uıymdastyrýshylardyń sózinshe, atalǵan shara aldaǵy ýaqytta turaqty túrde júzege asyrylyp turady.