Túrkistandy túletýge kásipkerler de atsalyspaq

TÚRKІSTAN. QazAqparat - Túrkistan oblysynyń ákimi Janseıit Túımebaev oblystyq, aýdandyq, qalalyq máslıhat depýtattarymen jáne isker azamattarmen kezdesti. Basqosýda aımaq basshysy oblys ortalyǵyn damytý úshin jasalǵan jobalar barysymen tanystyrdy, dep habarlaıdy QazAqparat.

Óńir basshysy Elbasynyń Túrkistandy túletýge barynsha nazar aýdaryp, oǵan respýblıkalyq bıýdjetten bólek, elimizdiń ózge óńirlerin, ulttyq kompanııalar men bıznes ókilderin atsalysýǵa shaqyrǵanyn atap ótti.

Jıynda Túrki jurtynyń rýhanı-mádenı ortalyǵyna aınalýy tıis Túrkistannyń eski jáne jańa kelbeti jaıyndaǵy fılm kórsetilip, isker azamattardy shahardy kórkeıtýde túrli áleýmettik nysandar men oıyn-saýyq ortalyqtary syndy halyqqa qajetti ǵımarattardy salýǵa shaqyrdy.

«Túrkistan qalasynyń týrıstik áleýeti óte joǵary. Ótken jyly 1 mıllıonnan astam týrıst kelgen bolsa, aldaǵy ýaqytta olardyń sanyn kóbeıtý kózdelip otyr. Osy maqsatta qalaǵa jańa áýejaı, temir jol vokzaly men avtovokzal, servıstik qyzmet kórsetetin áleýmettik-mádenı nysandar salyp, olarǵa qajetti ınjenerlik ınfraqurylymdy júrgizý josparlanýda. Atap aıtar bolsam, Jańa ákimshilik-iskerlik ortalyqta ákimshilik ǵımaraty, basqarmalar men departamentter úıi, drama teatry, kongress-holl, fılarmonııa, kitaphana, mádenıet saraıy, 500 oryndyq meshit, sport kesheni, stadıon, júzý basseıni, Nazarbaev zııatkerlik mektebi, saıabaqtar, kópqabatty turǵyn úıler, mektepter, balabaqshalar, kórme ortalyǵy, murajaı, opera jáne balet teatry, assambleıa ǵımaraty, densaýlyq saqtaý nysandary jáne t.b. áleýmettik-mádenı nysandar qurylystary men olarǵa qajetti ınfraqurylymdar júrgizýimiz kerek», - dedi Janseıit Túımebaev.


Jańa qarqynmen, jańa kúshpen jumys bastaýǵa qulshynys bildirgen jıynǵa qatysýshylar aımaq basshysyn biraýyzdan qoldady. Halyq qalaýlylarynyń atynan sóz alǵan oblystyq máslıhat hatshysy Qaırat Balabıev Memleket basshysynyń 26 jyl boıy kásipkerlerge járdem kórsetip kelgenin, endigi kezekte isker kásipkerlerdiń elge, memleketke qyzmet etetin ýaqyty kelgenin aıtyp ótti.

Qazirdiń ózinde kásipker ári oblystyq máslıhattyń depýtaty Serikjan Seıitjanov kıeli shaharda «Rixos» bes juldyzdy qonaq úıi sııaqty meımanhana salýdy bastap ketken. Al, túriktiń isker azamaty bes juldyzdy ekinshi qonaq úıdi turǵyzýdyń jobasyn túzip qoıǵan. Oblystyq máslıhattyń hatshysy, kásipker Qaırat Balabıev bolsa, sport fıtnes ortalyǵyn salýdy josparlap otyrǵanyn jetkizdi. Odan bólek, birqatar isker azamattar ózge de áleýmettik, mádenı nysandardy salýǵa nıettenip otyr.