Túrkistandy abattandyrý isine kelestikter de úles qosýda

KELES. QazAqparat – Túrkistan qalasynyń aýmaǵyn 16 sektorǵa bólip, oǵan jaýapty retinde oblystyń aýdan, qalalary men basqarmalary, jergilikti ákimdiktiń derbes bólimderi bekitilgen. Qala aýmaǵynyń ınfraqurylymyn damytyp, abattandyrý, kógaldandyrý jáne sýlandyrý jumystary oblys ákimi Ómirzaq Shókeevtiń tapsyrmasyna sáıkes júrgizilýde, dep habarlaıdy QazAqparat tilshisi.

Túrkistan qalasyndaǵy 16-shy sektor boıynsha atqarylatyn sharalarǵa Keles aýdany ákimdigi, Túrkistan oblysynyń densaýlyq saqtaý basqarmasy jáne Túrkistan qalasy ákimdiginiń memlekettik satyp alý bólimi bekitilgen bolatyn. Belgilengen aýmaqtyń kartasy men jadynama daıyndalyp, barlyq jaýaptylarǵa taratyldy. Oǵan sáıkes, 16-shy sektorǵa jaýapty mamandar 1 tamyzdan bastap belgilengen aýmaq boıynsha tolyq ońtaılandyrý jumystaryn júrgizdi.

Keles aýdany ákimidiginiń májilis zalynda aýdan ákimi Aqmentaı Esbaevtyń tóraǵalyǵymen 16-sektor aýmaǵyna tazalyq jumystaryn uıymdastyrý, sondaı-aq sektor aýmaǵyn abattandyrý boıynsha usynystardy talqylaý máselesinde jıyn ótti.

Aýdan ákiminiń orynbasary, 16-sektorǵa jaýapty etip bekitilgen Almas Seksenbaev sektor aýmaǵynyń jaǵdaıymen tanystyryp, atqarylatyn jumystar jobasymen bólisti. Derbes bólim basshylary, aýyl jáne aýyldyq okrýg ákimderi qatysyp óz oılary men usynystaryn ortaǵa saldy.

Jıyn barysynda aýdan basshysy aldaǵy ýaqytta 16-sektor aýmaǵyn tazalaý maqsatynda senbilik jumystary júretinin málimdedi.