Túrkistandaǵy jańa mýzykalyq drama teatrynda túrki álemine ortaq qoıylymdar sahnalanady

TÚRKІSTAN. QazAqparat – Túrkistanda jańadan ashylǵan Mýzykalyq drama teatrda túrki álemine ortaq qoıylymdar sahnalanady. Bul týraly Elbasy Nursultan Nazarbaevtyń Túrkistan oblysyna sapary barysynda aıtyldy, dep habarlaıdy QazAqparat tilshisi.

Tuńǵysh Prezıdent jańadan salynǵan mýzykalyq drama teatrdyń ashylý saltanatyna qatysyp, ujymmen kezdesti. Kompozıtsııalyq kórinisi men sáýlettik kelbeti ózgeshe teatrda tek qazaq akterleri ǵana emes, sheteldik tanymal óner qaıratkerleri de óner kórsetedi. Tórt qabatty mádenıet ordasynyń kórermender zaly 510 adamǵa arnalǵan. Munda vestıbıýldiń, kýlýarlardyń, foıeniń, jınaqtaý holdary men VIP zaldar ulttyq naqyshpen bezendirilgen. Teatrda kórermenge jáne qyzmettik personalǵa shuǵyl medıtsınalyq kómek kórsetetin dáriger de qarastyrylǵan.

Teatardyń bas dırektory Aınur Kópbasarovanyń aıtýynsha, 190 adam shtattyq rejımde jumys isteı alady. Qazir akterlerdi jumysqa qabyldaý jurip jatyr. Olardyń qatarynda Dýbaıda, Máskeýde tájirıbe jınaǵan rejısserler men kompozıtorlar, menedjerler bar.

«San ǵasyrlyq tarıhy bar osyndaı kıeli ólkedegi óner ordasy Elbasynyń bastamasy, qoldaýymen salyndy. Bul óner ortalyǵynyń ereksheligi jáne kontseptsııasy - preformatıvti teatr atanýynda. ıAǵnı, qazaqstandyq qana emes, túrki álemine ortaq memleketterdiń akterleri de kelisimshart negizinde osynda jumys isteıdi. Teatrǵa jas ballet trýppasy, hor, opera ártisteri, drama akterlerin kastıng arqyly alyp jatyrmyz. 25 jasqa deıingi jas akterlerdi osynda úsh jylǵa oqytyp, túrli kýrstar, qoıylmdar arqyly sheberligin shyńdaımyz. Alys-jaqyn shetelden, respýblıkanyń ár óńirinen talantty jas rejısserler, stsenograftar, horeograftar, akterlerdi jınap jatyrmyz. Talantty jastardyń ishinde «Belcanto» Vena akademııasynyń túlegi Aııa Shárip, tanymal kompozıtor Hamıt Shanǵalıev, «Watanabe Buber» balet akademııasyn, Vaganova atyndaǵy orys balet akademııasyn bitirgen Mao Sakaı syndy prıma-balerınalarymyz bar. Teatrdyń alǵa qoıǵan jospary kóp», -deıdi Aınur
Kópbasarova.

Jańa ǵımarattyń jalpy aýdany 11 myń sharshy metrden asady. Teatr basshylyǵynyń málimetinshe, alǵashqy qoıylym 5 qyrkúıekte kórermen nazaryna usynylady. Oǵan deıin sahnany bezendirý, qajetti qural-jabdyqtarmen qamtamasyz etý jumystary júrgizilmek.