Túrkistandaǵy «Uly dala ortalyǵy» taǵy bir qundy jádigermen tolyqty

TÚRKІSTAN. QazAqparat - Túrkistan oblysyna QR Aqparat jáne qoǵamdyq damý vıtse-mınıstri Bolat Tilepov jumys saparymen keldi. Vıtse-mınıstr sapary barysynda Qoja Ahmet ıAsaýı kesenesine zııarat etip, sol mańdaǵy etnoaýyl men botanıkalyq baqty aralap kórdi, dep habarlaıdy QazAqparat tilshisi.

Sharaǵa Túrkistan oblystyq mádenıet basqarmasynyń basshysy Ázimhan Qoılybaev, oblystyq qoǵamdyq damý basqarmasynyń basshysy Damır Júnisov jáne BAQ ókilderi qatysty. Bolat Tilepov «Uly dala eli» ortalyǵynda «Ulylardan qalǵan mura» atty is-sharaǵa qatysyp, óziniń jeke muraǵatynda saqtalyp kelgen qazaq hany Abylaıdyń Reseı patshaıymy Ekaterına Alekseevnaǵa jazǵan hatynyń tupnusqasyn ortalyq basshylyǵyna saltanatty túrde tabys etti. Jıynda sóz alǵan Bolat Anapııauly rýhanı astanamyzdyń kún sanap kórkeıip, jandanyp, qaıta túlep kele jatqany Elbasymyzdyń osydan úsh jyl burynǵy qabyldaǵan tarıhı sheshiminiń jemisi ekenin tilge tıek etti.

«Kóne Túrkistan shahary nebári úsh jyldyń aralyǵynda adam tańǵalarlyqtaı ásem de, kórki kóz tartar shaharǵa aınaldy. Taıaýda ǵana Túrkistan – Túrki elderiniń mádenı astanasy atanyp, Qazaq eliniń naǵyz mádenı, rýhanı ortalyǵy ekenin barsha jurtqa pash ete bastady. Sońǵy eki jylda qalada 200-den astam mádenı, rýhanı, áleýmettik nysandar boı kótirip keledi. Osy rette men de búkil qazaq halqynyń tereń tarıhynan syr sherter jádigerlerdiń altyn uıasyna aınalyp otyrǵan «Uly dala eli» ortalyǵyna jeke muraǵatymda saqtalyp kelgen Abylaı hannyń orys patshaıymy Ekaterına Alekseevnaǵa jazǵan hatyn tapsyrýdy jón kórdim», – dedi Bolat Anapııauly.

Aıta keteıik, «Uly dala eli» ortalyǵy Nursultan Nazarbaevtyń ótken jyly Túrkistan qalasyna sapary barysynda ashylǵan bolatyn. Ortalyqtyń negizgi maqsaty – Elbasymyzdyń «Uly dalanyń jeti qyry» baǵdarlamalyq maqalasynda atap ótilgen tarıhı qundylyqtardy nasıhattaý. Ortalyq Qazaq handyǵynyń qurylǵanynan bastap, jańa dáýir damýyna deıingi ártúrli taqyrypty ashatyn 9 tarıhı-zamanaýı zaldan turady. Birinshi qabatta Túrkistan qalasy túrki halqynyń rýhanı astanasy bolǵandyqtan túbi bir túrki halyqtarynyń baǵa jetpes qundylyǵy, Kúltegin eskertkishiniń úshinshi kóshirmesi qoıylǵan.

Kóne jádigerlerdi aralap kórgen vıtse-mınıstr ortalyq qyzmetkerleriniń jumysyna shyǵarmashylyq tabys tiledi. Sondaı-aq, ol «Kerýen saraı» keshenin, Tuńǵysh Prezıdent saıabaǵyn, «Altyn Samuryq» teatryn, fýdkor aımaǵyn aralap kórdi.