Túrkistandaǵy tarıhı qazba jumystaryna jastar tartylmaq
Jýyrda ǵana Elbasy Nursultan Nazarbaev bıylǵy jyldy "Jastar jyly" dep jarııalaǵany belgili. Búginde elimizdiń Mádenıet jáne sport mınıstrliginiń qoldaýymen «Áziret Sultan» memlekettik tarıhı-mádenı qoryq-mýzeıine qarasty Kúltóbe qalashyǵy mańaıynda arheologııalyq qazba jumystary júrgizilýde.
«Aýdannyń 20-ǵa jýyq jastaryn kıeli Túrkistan qalasyndaǵy arheologııalyq qazba jumystaryna alyp keldik. Aldaǵy ýaqytta da bul ortalyqpen tyǵyz qarym-qatynas ornata otyryp, jas mamandar qajet bolyp jatsa qamtamasyz etýge kúsh salatyn bolamyz. Aýdanda qazir jumyssyz jastar tizimi daıarlanýda. Túrkistandy túletýge qoldaý bildire otyryp, tıisinshe basqa da salalarǵa qajetti jastardy túgeldeı jiberýge atsalysamyz»,-dedi Otyrar aýdandyq Jastar resýrstyq ortalyǵynyń dırektory Dáýren Aqsaqalov.
Búgingi tańda, Kúltóbede qazba jumystaryn júrgizip jatqan 80-nen asa arheologtyń basym bóligin jastar quraıdy.
«Otyrar men Túrkistan bir-birine jaqyn, ári tarıhy da tyǵyz baılanysty. Elbasy Nursultan Ábishuly Nazarbaevtyń tarıhı sheshimi Jastar jylymen ushtasýy da aıtýly jaǵdaı. Biz Otyrar aýdanynyń jastary tarıhı jumystarǵa ózimiz belsene kirisip, eńbegimiz arqyly qoldaý bildiretinimizge qýanyshtymyz. Kóne qalalardy anyqtaý úshin uqypty, ári zeıindi bolý basty orynda.Jumys óte qyzyqty eken»,-deıdi otyrarlyq jas arheolog Álı Seralıev.
Aldaǵy ýaqytta aýdandaǵy jastardyń eńbekke qabilettiligi eskerile otyryp, Túrkistandaǵy qarqyndy jumysqa qajetinshe jumyldyrylmaq.