Túrkistandaǵy saıabaqtarǵa jasandy araldar men toǵandar salynýda

TÚRKІSTAN. QazAqparat – Túrkistanda týrıster tamashalaıtyn nysandar kóbeıýde. Qazirgi tańda qalada 11 kıeli nysan men murajaı, 6 rýhanı-mádenı ortalyq, 4 týroperator kelýshilerge óz qyzmetin usynýda, dep habarlaıdy QazAqparat tilshisi.

- Bıylǵy jyly 40 myń sharshy metr saýda alańy bar «Kerýen-saraı» kesheni iske qosyldy. 510 oryndyq drama teatr jumysyn bastap, alǵashqy spektaklderimen kórermenderin qýantýda. Halyqaralyq áýejaı paıdalanýǵa berildi. Bul nysandar qala týrızmin damytýǵa eleýli serpin berdi. Qolǵa alynǵan bul bastamalar, jalpy týrızmdi damytý jumysynyń qarqyndy damýyna áser etýde. Nátıjesinde bıylǵy jyldyń qańtar-qyrkúıek aılarynda Túrkistan qalasyna kelýshi zııaratshylar men týrıster sany 1 124 503-ǵa jetti, – dedi Túrkistan qalasynyń ákimi Nurbol Turashbekov.

Túrkistan qalasynda búginde 400 gektar jerge ornalasqan 11 saıabaq, 5 jasyl aımaq, 25 alleıa men gúlzar bar. Ár saıabaq kreatıvti ári erekshe, qaıtalanbas úlgide salynýda. Máselen, jalpy aýmaǵy 38 gektardy quraıtyn «Tuńǵysh Prezıdent saıabaǵynda» syıymdylyǵy 100 tekshe metr bolatyn jasandy aral paıda boldy. 10 myńǵa jýyq aǵash otyrǵyzylyp, joldar tóseldi. Sattarhanov kóshesiniń boıyndaǵy «Jelilik» saıabaqtyń da jer kólemi 20 gektardan asady. Onda 5 myńǵa jýyq aǵash, 25 myńǵa jýyq jasyl buta egilip, jasandy toǵan ornatylǵan. Myńnan astam shammen jaryqtandyrylyp, sýburqaq, oryndyqtar, 2 myńnan astam kishi arhıtektýralyq forma qoıyldy.