Túrkistandaǵy Naýryz toıynda 1 tonnadan astam palaý daıyndalyp, 1 500 lıtrdeı naýryz kóje úlestirildi
Aqshańqar kıiz úılerde dastarhanǵa ulttyq taǵamdarymyz qazy-qarta, jal-jaıa, qymyz, shubat, naýryz kóje, qurt, irimshik, sirne, qaımaq, baýyrsaq, shı baýyrsaq, jent sekildi jeńsik astar qoıyldy. Munan bólek, kelýshiler ejelgi qazaq aýylynda halqymyzdyń salt-dástúrlerin dáripteıtin túrli sharalar men ulttyq sport túrlerinen ótken saıystardy tamashalasa, jastar jaǵy altybaqan teýip, saıran saldy. Sonymen qosa, mártebeli meımandar ádep-ǵuryp jáne salt-dástúr ortalyǵynyń qyzmetkerleri uıymdastyrǵan tusaýkeser rásimine qatyssa, óńir basshysy Janseıit Túımebaev túrkistandyq baldyrǵannyń tusaýyn kesti. Túrkitildes elderden kelgen meımandar Túrkistanda ótken osynaý «jańarý» kúnindegi torqaly toıdan erekshe áser alyp, ulttyq salt-dástúrlerimizdiń tárbıelik maǵynasy tereńde jatqanyn jetkizdi.
«Ulystyń uly kúninde halyq bir-birine baqyt, molshylyq, yntymaq, birlik tileıdi. Jyldan jylǵa elimizde naýryz túrlenip, ajarlanyp, tereńdep, halyqtyń súıegine, qanyna sińip jatyr. Bul úlken qýanyshymyz. Bıyl onyń ústine qasıetti Túrkistan túrki halyqtarynyń rýhanı astanasy bolyp jarııalandy. Astanada júrmiz biz búgin. Bul bizdiń keshegi Mustafa Shoqaı bastaǵan aǵalarymyzdyń armany edi. Olar Túrkistan memleketin qurdy, biraq ǵumyry uzaq bolmady. Endi sol baqyt qaıta kele jatyr. Myna Naýryz táýelsizdik ekeýi qosylyp, túrik kindiginen jaralǵan urpaqtyń basyn qosyp jatyr. Kók túriktiń balalary ajyramasyn. Elimizde tynyshtyq bolsyn, naýryzdan naýryzǵa aman esen jeteıik», - deıdi belgili ǵalym, memleket qaıratkeri Myrzataı Joldasbekov.
Aıta keteıik, «Túrkistan Túrki áleminiń mádenı astanasy» jylynyń aıasynda osy kúni Q.A.ıAsaýı atyndaǵy HQTÝ-de «Túrkistan jáne Túrkologııa» atty Halyqaralyq ǵylymı-teorııalyq konferentsııa ótip, sharaǵa kelgen qonaqtarmen oblys ákiminiń kezdesýi josparlanǵan. Sonymen qatar, is-shara sońy túrki tildes memleketterden kelgen óner ujymdarynyń gala-kontsertimen jalǵasady dep kútilýde.