Túrkistandaǵy halyqaralyq áýejaıdy túrkııalyq kompanııa salady
Óńir basshysy sondaı-aq, jańa oblys ortalyǵynda eki birdeı bes juldyzdy qonaqúı turǵyzylatynyn atap ótti. Budan bólek, Túrkistanda elimizde teńdesi joq 200 gektarlyq jylyjaı salynatynyn jetkizdi. Al, erteń túıe sútin óńdeıtin alyp zaýyt ashylady dep kútilýde. Janseıit Túımebaev forýmda, sonymen qatar, Túrkistan oblysy ınvestıtsııa tartý boıynsha respýblıkada kósh basynda keletinin aıtty. Máselen, ótken jyly bul maqsatta 482 mlrd teńge qarjy quıylǵan. Endi taǵy 4,8 mlrd AQSh dollaryn quraıtyn 26 jobany júzege asyrý josparda bar. Qazirdiń ózinde onyń 12-si iske asyrylyp jatyr.
«Túrkistan - talaı jyldar boıy qazaq handyǵynyń jáne túrki áleminiń saıası ordasy, rýhanı astanasy bolǵan shahar. Elbasymyz osynaý kóne qalany oblys ortalyǵy etip, ony damytýǵa erekshe yqylas tanytyp otyrǵany belgili. Búginde memleket tarapynan jalpy quny 2 mlrd AQSh dollaryn quraıtyn ınvestıtsııa quıý josparlanyp otyr. ıAǵnı, munda áýejaı, ákimshilik-iskerlik ortalyq jáne turǵyn úıler boı kóterip, Túrkistan zamanaýı úlgidegi tehnologııa engizilgen aqyldy qalaǵa aınalatyny sózsiz. Qazirdiń ózinde óńirdiń ekonomıkalyq damý múmkindigine qanyqqan otandyq jáne túrik kompanııalary 100 mln AQSh dollarynan asatyn qarjy salyp, 5 juldyzdy qonaq úıler, oıyn-saýyq, saýda oryndary men fıtnes ortalyqtar ashýdy kózdep otyr. Búgingi jıyn ózderińizben osyndaı iskerlik qarym-qatynas ornatyp, nyǵaıtýǵa sep bolady degen senimdemin», - dedi Janseıit Qanseıituly.
Sonymen qatar, óńirdi damytýǵa baǵyttalǵan kez kelgen jobany barlyq taraptan qoldaýǵa daıyn ekenin aıtqan oblys ákimi, aımaqty úsh baǵytta damytýǵa basymdyq berilgenin jetkizdi. Erekshe tarıhı-arhıtektýralyq jáne arheologııalyq eskertkishteri, aıryqsha tabıǵaty bar óńirdiń birinshi damý baǵyty - týrızm. Qazirdiń ózinde munda keletin týrıter sany jyl sanap artyp keledi. Máselen, ótken jyly oblysqa 270 myńnan astam sheteldik kelgen. Bul 2016 jylmen salystyrǵanda 40 paıyzǵa artyq. Investıtsııa tartýǵa qolaıly ekinshi baǵyt - aýyl sharýashylyǵyn. Aýa raıy jaıly oblystyń aýyl sharýashylyq salasy damýy jaǵynan respýblıkada birinshi orynǵa shyqqan. Sondaı-aq, logıstıkalyq jáne tranzıttik áleýetti kóterý - kestede turǵan úshinshi másele.
Oblystyń ekonomıkalyq jáne ınvestıtsııalyq áleýetine qanyqqan sheteldik qonaqtar Túrkistan óńirinde týrızm, aýyl sharýashylyǵy, kásipkerlik salalaryn damytýǵa atsalysýǵa nıetti ekendikterin bildirdi. Sondaı-aq, Iran, Malaızııa, Qytaı elderinen kelgen ınvestorlar aımaqta zamanaýı úlgidegi áleýmettik nysandar salyp, ınraqurylym men tsıfrlyq tehnologııany damytýǵa kúsh salatynyn da atap ótti.