Túrkistandaǵy «Áziret Sultan» mýzeıinde qýǵyn-súrgin qurbandaryna arnalǵan kórme ashyldy

TÚRKІSTAN. QazAqparat - Túrkistandaǵy «Áziret Sultan» mýzeıinde «31 mamyr - saıası qýǵyn-súrgin qurbandaryn eske alý kúnine» oraı foto jáne kitap kórmesi ashyldy. Kitaphana bólmesinde uıymdastyrylǵan kórmege repressııa jyldaryna arnalǵan kitaptar qoıyldy, dep habarlaıdy QazAqparat tilshisi.

Kórmeni tamashalaýshylar sondaı-aq, tarıhı sýretter, tulǵalar jaıly derekter, buqaralyq aqparat quraldarynda jarııalanǵan maqalalarmen tanysa alady. Atalǵan shara barysynda qazaq tarıhyndaǵy tuǵyry bıik tulǵalar jaıly qoryq-mýzeıdiń ǵylymı-zertteý bóliminiń kishi ǵylymı qyzmetkeri Indıra Djalısheva baıandama oqyp, ár jádigerdiń qundylyǵy jóninde aqparat berdi.
Quıtyrqy saıasattyń qurbanyna aınalǵan zııalylardyń aýyr taǵdyry jaıly qysqametrajdy derekti fılm kórsetildi. Ony tamashalaǵan turǵyndar aǵa býynnyń kórgen azaby tańbaly tarıhtyń tól betterinde máńgilik óshpeıtinin jetkizdi.
«Arystarymyz atylyp, asylyp, jer aýdarylsa da azat kúnniń aq tańynyń sáýlesine jol ashyp ketti. Árbirimiz ult zııalylaryn, jazyqsyz sheıit bolǵan halqymyzdy máńgilikke umytpaı, qadir tutýymyz tıis. Kórmede turǵan árbir tarıhı mura - eliniń erteńin kóksegen tulǵalarymyzdyń óshpes izderi»,- dedi «Áziret Sultan» memlekettik tarıhı-mádenı qoryq-mýzeıi dırektorynyń orynbasary Murat Tastanbekov.

Aıta keteıik, atalǵan kórme bir aı kóleminde qoıylmaq. Mýzeıge kelýshiler men kitaphana oqyrmandary ondaǵy tarıhtan syr shertetin qundy jádigerlermen osy ýaqyt aralyǵynda tanysa alady.