Túrkistandaǵy «Áziret Sultan» qoryq-mýzeıine qarasty tarıhı-mádenı oryndar qaıta jańǵyrtylyp jatyr

TÚRKІSTAN. QazAqparat – Túrkistan qalasyndaǵy «Áziret Sultan» qoryq-mýzeıiniń 2019-2021 jyldarǵa arnalǵan úsh jyldyq damý jospary qolǵa alynǵan bolatyn. Osyǵan oraı búginde tarıhı eskertkishterdi qaıta jańǵyrtý jumystary men arheologııalyq qazba jumystary júrgizilýde, dep habarlaıdy QazAqparat tilshisi.

Qazirgi tańda keshendi ǵylymı, restavratsııalyq jumystardyń nátıjesinde Qoja Ahmet ıAsaýı kesenesiniń Qabirhana, Qazandyq, Úlken Aqsaraı, Qabirhana, Qudyqhana bólmelerin aqtaý jumystary júrgizildi. Sondaı-aq, Qoja Ahmet ıAsaýı kesenesiniń kúmbezi, Kazarma, Rabııa Sultan Begim kesenesi, Shyǵys monshasy, Juma meshiti, Darbaza qaqpasy, Han meshiti, Jeti ata qaqpasy, Qylýet jer asty meshitterinde restavratsııalaý jumystary qarqyndy júrýde.

XI-XII ǵasyrdaǵy 40 meshittiń ishinen qazirgi zamanǵa deıin jetken jalǵyz dinı oryn Juma meshitin mıhrabymen birge tolyǵymen jańǵyrtý jáne aǵash bastyrmasyn keńeıtý jumystary da josparlanǵan. Al, meshittiń ońtústik-shyǵys qabyrǵalaryna demontaj jumystary qolǵa alynatyn bolady.

XI-XII ǵasyrǵa tán Qylýet jerasty meshitin qaıta jańǵyrtý barysynda ǵımarattyń negizgi salmaq túsetin qurylymdary men jerasty qurylysynyń irgesin keńeıtý jumystary jasalýda. Sonymen qatar XV ǵasyrdyń tarıhı jádigeri ortaǵasyrlyq shyǵys monshasy men kúmbezdiń juqa qabatyn, ıntererin restavratsııalaý, ekinshi esikti salý jáne irgeles aýmaqty abattandyrý josparlanyp otyr.

Kazarma sáýlettik ǵımaratyna 2000 jyldan beri kúrdeli jóndeý júrgizilmegen bolatyn. Qazirgi tańda sáýlet eskertkishiniń shatyry tolyǵymen aýystyrylyp jatyr.