Túrkistanda zııaly qaýym ókilderi bas qosty

TÚRKІSTAN. QazAqparat – Túrkistan oblysyna kelgen zııaly qaýym ókilderi birqatar ózekti máselelerdi talqylap, óńirdiń mádenıeti, rýhanııaty men bilim salalaryna qatysty usynys-pikirlerin ortaǵa saldy, dep habarlaıdy QazAqparat tilshisi.

Keleli keńeste týrızm salalary men óner, qazaq tiliniń búgingi ahýaly áńgime arqaýyna aınaldy. Túrkistanda «Abaı mektebi» men jazýshylar qaýymy arqa súıeıtin orda ashylýy kerek degen pikir bildirildi. Sansyz baptar mekeni Saıramnyń tyń qupııalaryn ashyp, tylsym tarıhyn zertteý usynyldy. Zııaly qaýym Túrkistandy ýaqyt talaby qajet etetin ulttyq kodtan aýytqymaı otyryp damytý jaıyn aıtty. Tarıh ǵylymdarynyń doktory, professor Jambyl Artyqbaev Saýrandaǵy kóneden qalǵan káriz joldary jaıly sóz etti. Áli kúnge deıin saqtalǵan aýmaqty qaıta jandandyryp, ádemi dúnıege aınaldyrýdy usyndy. Bul kárizdi Úndistannan ákelingen quldar nemese ırandyqtar jasaǵan, degen boljam bar.

«Ystyq ólkelerde qashan da káriz qudyqtary paıdalanylǵan. Káriz aýylynan shyǵar jerde Alańbulaq degen bulaq bar. Alańbulaqtan Túrkistanǵa deıin onshaqty qudyqtyń izi jatyr. Sý Alańbulaqqa deıin kelip Túrkistanǵa jerasty joldarymen jetken.

«Túrkistan jaýgershilik zamanda qalaı qorǵandy» desek, osy sýdyń arqasynda qorǵanyp otyrǵan. Aýyldyń Káriz atanyp ketkeni de sodan bolǵan. Kárizge jaýapty adamdar da bolǵan. Mine bul da bir Túrkistannyń erekshe qupııalarynyń biri», - dedi Jambyl Omaruly.

Óz kezeginde Sáken Qalqamanov barlyq usynystardy nazarǵa alatynyn jetkzdi. Zııaly qaýym ókilderine qurmet kórsetip, syı-sııapat jasady. Qonaqtar sondaı-aq, «Alataý medıa-ortalyǵyn» aralap, Túrkistan tórinde ornatylǵan hakim Abaıdyń jańa eskertkishine bardy. Uly aqyn músininiń ereksheligine joǵary baǵasyn berdi.