Túrkistanda jurtshylyqqa 500-ge jýyq jumys orny usynyldy

NUR-SULTAN. QazAqparat - Búgin QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Túrkistan oblysy boıynsha departamenti men oblys ákimdiginiń birlesip uıymdastyrýymen «Bos memlekettik ákimshilik laýazymdar jármeńkesi» ótti, dep habarlaıdy QazAqparat.

Jármeńkege «Memlekettik qyzmet mektebiniń» tyńdaýshylary, joǵary jáne orta arnaýly oqý oryndarynyń bitirýshi túlekteri men jumyssyzdyq boıynsha tirkeýde turǵan azamattar qatysty.

Іs-sharanyń maqsaty - memlekettik qyzmet júıesine belsendi, jańashyl kózqarastaǵy jastardy tartý, oblystaǵy jumyssyzdyq deńgeıin tómendetý, memlekettik qyzmetke qyzyǵýshylyq tanytqan tulǵalarǵa bos laýazymdarǵa ornalasý tártibin túsindirý.

Jármeńkede oblys ortalyǵyndaǵy jergilikti jáne aýmaqtyq memlekettik mekemelerdiń, áleýmettik sala boıynsha, sondaı-aq, qala, aýdan ákim apparattaryndaǵy bos memlekettik qyzmet laýazymdary jurtshylyq nazaryna usynylyp, jalpy 500-ge jýyq uıymnyń bos jumys oryndary tanystyryldy.

Shara aıasynda jastardy patrıottyq rýhqa tárbıeleý, olardyń memlekettik qyzmetke degen senimin arttyrý baǵytynda arnaıy daıyndalǵan beınerolık kórsetildi.

Sonymen qatar jármeńkede QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Túrkistan oblysy boıynsha departamenti basshysy Ǵalym Tursynbaev talapty jastardy memlekettik qyzmetke jáne áleýmettik salalarda jumys isteýge shaqyrdy.