Túrkistanda jańa ákimshilik-iskerlik ortalyqtyń qurylysy bastalady

TÚRKІSTAN. QazAqparat - Memleket basshysy N.Á.Nazarbaev Túrkistan oblysyna resmı saparynda birneshe otandyq kompanııaǵa Túrkistan qalasyndaǵy ákimshilik ortalyqta ǵımarattar salýdy tapsyrǵan bolatyn. Osyǵan oraı Túrkistan oblysynyń ákimi Janseıit Túımebaev qazaqstandyq ınvestorlar «BI Group» jáne «Saýts-Oıl» kompanııalarynyń ókilderin qabyldady, dep habarlaıdy QazAqparat oblys ákiminiń baspasóz qyzmetine silteme jasap.

Júzdesýde ınvestorlar oblys ortalyǵy Túrkistan qalasyn damytýǵa óz úlesterin qosýǵa nıet bildirip, «BI Group» kompanııasy Túrkistan qalasynda 50 myń sharshy metrdi quraıtyn bıznes ortalyqtyń jobasyn usyndy. Ortalyqta ofıstik bólmeler, májilis zaldary, jerasty avtoturaq ornalasady. Al «Saýts-Oıl» kompanııasy 120 bólmelik 5 juldyzdy qonaq úıdiń sáýlet-josparlaý eskızin tanystyrdy. Qonaq úı standartty, lıýks oryndarynan bastap, eń joǵarǵy úlgide jabdyqtalǵan jaıly bólmelermen, meıramhana jáne kontsert zalymen qamtylmaq. 

Ǵımarat jobalarymen tanysqan oblys basshysy ınvestorlarǵa eskızdik jumystardy jetildirip, qurylysty ýaqtyly bastaý qajettigin jetkizdi.

«Ákimshilik iskerlik ortalyqta jańa oblystyq ákimdik, basqarmalar men departamentter jáne kongress-ortalyq pen «Rıksos» qonaq úıi ǵımarattarynyń qurylysy qatar júredi. Jumysshylar 3 aýysymmen jumys isteıdi. Barlyq ǵımarattyń josparyn tolyq ázirlep, qurylysty qazirden bastaý kerek», - dedi Janseıit Qanseıituly.

«BI Group» kompanııasy ókilderi jańa ákimshilik iskerlik ortalyqta oblystyq ákimdik pen aýmaqtyq mekeme ǵımarattarynyń jáne Kongress-ortalyqtyń qurylysyn júrgizedi. Ortalyqta forým, sammıt, kontsert zaldar ornalasady. Kompanııa mamandarynyń aıtýynsha, qurylys bastalsa, atalǵan barlyq nysandar 1 jarym jyl ishinde tolyq aıaqtalmaq.

Kezdesý qorytyndysynda oblys ákimi J.Túımebaev ınvestıtsııalyq jobalardy iske asyrýǵa ınvestorlar men ákimdik arasynda birlesken jumys josparyn ázirlep, jumys tobyn qurýǵa tapsyrma berdi.