Túrkistanda zańsyz jer telimderi memleketke qaıtarylýda

TÚRKІSTAN. QazAqparat – Túrkistan qalasynyń ákimi Rashıd Aıýpovtyń tóraǵalyǵymen ótken májiliste turǵyndardyń óz betinshe jerlerdi ıelený faktileri boıynsha atqarylǵan jumysy jaıy aıtyldy. Sondaı-aq, qaladaǵy qurylys jobalarmen qamtamasyz etý men aldyn ala berilgen tapsyrmalarynyń oryndalý barysy talqylandy, dep habarlaıdy QazAqparat tilshisi.

Qalalyq jer qatynastary bóliminiń basshysy N.Qasymbekovtyń aıtýynsha, Túrkistan shaharynyń aýmaǵy 19 627 ga jerdi quraıdy. Ótken aptada atalǵan bólim qyzmetkerleri qala aýmaǵynda jer ýchaskelerin zańsyz ıelený derekteri boıynsha tekserý júrgizgen.

«Bekzat» móltek aýdanynda bolyp, anyqtaý jumystary nátıjesinde jalpy sany 93 zań buzýshylyq anyqtaldy. Onyń ishinde 42-si óz betinshe ıelený, 16 jer ıgerilmegen, 34 jer ýchaskesi nysanaly maqsatyna sáıkes paıdalanylmaǵan. Atalǵan móltek aýdanynyń shetinen turǵyndardyń óz betterinshe úı salyp alý faktileri oryn alǵan. Qala turǵyndarymen kezdesý barysynda olardyń qoldarynda 2005 jylǵy «ıAssy» aýyl okrýgi ákimdiginiń sheshimi bar ekendigi anyqtalyp, jalpy sany 230 sheshim tabylǵan. Osy 230 sheshimniń 138-i aýmaǵynda qurylys jumystary júrgizilgen. Nysandardyń 81-i turǵyn úı bolsa, 57-inde úıdiń irgetasy qalanǵan. Joǵaryda aıtylǵandaı sheshimderdiń zańdylyǵy kúmán týǵyzyp otyr», - dedi N.Qasymbekov.

Bólim basshysy áldebir azamattardyń jergilikti halyqqa jer satyp, qujattaryn rásimdep beremin dep alıaqtyq jolmen aınalysyp jatqanyn málim etti. Bul jóninde qazir qalalyq polıtsııa basqarmasyna arnaıy hat joldanypty. Sonymen birge jer ýchaskelerine qujattary rásimdelmese de «Ońtústik Jaryq» mekemesi elektr qýatyn qosýǵa ruqsatyn negizsiz berip, eseptegish quraldaryn ornatyp bergeni belgili boldy.

Mamandar munyń óz kezeginde azamattardyń zańsyz turǵyn úı salýyna jaǵdaı jasaý bolyp otyrǵanyn aıtady. Osyǵan baılanysty atalǵan úılerge elektr qýatyn qosýdy toqtatý, bul jóninde arnaıy jumys tobyn qurý, zańsyz jer satýmen aınalysyp jatqan azamattardyń qylmystyq jaýapkershiligin qaraý qajettigin atap ótti.

Jıyn barysynda qala ákimi R.Abatuly berilgen tapsyrmalardyń merziminde ári sapaly oryndalýyn tıisti derbes bólimderiniń basshylaryna nyqtap tapsyrdy.