Túrkistanda zańsyz oq-dári satatyn dúken anyqtaldy
Túrkistan oblysy PD Uıymdasqan qylmysqa qarsy kúres basqarmasynyń qyzmetkerleri iri kólemde zańsyz oq-dáriler satý, saqtaý qylmysynyń jolyn kesti.
Tártip saqshylary jedel-izdestirý is-sharalary kezinde oblys ortalyǵynda zańsyz oq-dári satatyn dúkendi anyqtady. Jedel ýákilder saýda dúkenine qatysty tıisti aqparattar jınaqtap, tintý jumystaryn júrgizdi. Nátıjesinde kúdikti retinde oq-dárilerdi satyp, saqtaýmen aınalysatyn bir er adam, bir áıel anyqtaldy. Al, olar jumys istegen dúkennen 2 myńǵa jýyq oq-dári tárkilendi. Onyń ishinde, 990 danasy 16 kalıbrli ańshylyq myltyqqa arnalǵan bolsa, 15 keli bytyra jáne bir dybys tunshyqtyrǵysh, sonymen qatar dúken qoımasynan 12 qorapta jalpy 925 oq alyndy. Satýshy áıeldiń úıinen 9 mm VALTRO-COMBAT gazdyq tapansha tárkilendi.
Atalǵan jaıt QR QK-niń 287-baby 4-bóligi (Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý) boıynsha tirkeldi. Ballıstıkalyq saraptama taǵaıyndaldy. Qazirgi ýaqytta sotqa deıingi tergeý amaldary júrgizilip jatyr.
Foto: polisia.kz