Túrkistanda zańsyz qurylysqa baqylaý kúsheıtildi

TÚRKІSTAN. QazAqparat - Túrkistan qalasynda zańsyz qurylysqa baqylaý kúsheıtildi. Oblystyq Memlekettik sáýlet-qurylys baqylaýy basqarmasy tarapynan aǵymdaǵy jyldyń 9 aıynda 2 420 nysannyń qurylysy tekserildi, dep habarlaıdy QazAqparat tilshisi.

Óńirde jeke qarajat esebinen - 2 057, bıýdjet qarajaty esebinen 363 nysan salynyp jatyr. Búgin bul týraly Túrkistan oblysy Óńirlik kommýnıkatsııalar qyzmetinde ótken brıfıngte Memlekettik sáýlet-qurylys baqylaýy basqarma basshysynyń orynbasary Merlan Kerimjanov málim etti. Onyń aıtýynsha, zańdyq normalar men talaptardy buza otyryp salynǵan ári nusqamalar talaptaryn oryndamaǵan 356 nysan ıelerine qatysty shara qoldanylǵan.

«Bıýdjet esebinen salynyp jatqan qurylys nysandarynda 114 merdiger mekemesine jáne 14 jobalaýshy mekemege QR Ákimshilik quqyq buzýshylyq týraly kodeksine sáıkes sharalar qoldanyldy, jalpy 15,6 mln teńge aıyppul salyndy. Injınırıngtik qyzmet kórsetý talaptaryn buzǵan 19 tehnıkalyq qadaǵalaýshynyń attestattary 6 aıǵa toqtatylyp, 8,2 mln teńge aıyppul salynǵan», - dedi Merlan Kerimjanov.
 

Budan bólek, óńirdegi «qyzyl syzyqqa» ótip salynǵan nysandardy tekserý barysynda jergilikti ákimdikterdiń qurylys salýǵa jer telimin berý kezinde jol jıeginiń «qyzyl syzyǵyn» jáne sanıtarlyq qorǵaý aımaqtarynyń ara qashyqtyqtaryn saqtaý talaptaryn buzǵandyǵy anyqtalyp otyr.

Atalmysh basqarma qyzmetkerleri budan basqa monıtorıng júrgizý barysynda aýdan, qala ákimdikteriniń hattary men jeke jáne zańdy tulǵalardyń aryzdary boıynsha qadaǵalaý, tekserý júrgizip jatqanyn málim etti.