Túrkistanda veterınarııalyq preparattar shyǵaratyn zaýyt salynady
Aýyl sharýashylyǵy mınıstriniń birinshi orynbasary Aıdarbek Saparovtyń aıtýynsha, 2020 jyly respýblıkanyń aýyl sharýashylyǵynyń jalpy óniminde Túrkistan oblysynyń úles salmaǵy shamamen 12% bolyp, 729,7 mlrd teńgege jetken.
Bul - el boıynsha úshinshi kórsetkish sanalady.
«Óńirdi damytýdiń keshendi jospary aıasynda bes jyl ishinde 93 jobany iske qosý josparlanǵan. 232,7 myń tonna kókónis alýǵa múmkindik beretin 24 jylyjaı, 76,2 myń tonna ónim beretin 15 baq sharýashylyǵy, óndiristik qýaty 143,3 myń tonna ósimdik óńdeıtin 9 keshen, sondaı-aq syıymdylyǵy 19,3 myń tonna bolatyn 5 kókónis saqtaý qoımasyn salý kózdelip otyr», - dedi Aıdarbek Saparov.
Vıtse-mınıstr 7,6 myń gektar alańda aýyl sharýashylyǵy jerin sýarý boıynsha 10 joba iske asatynyn aıtady.
«Mal sharýashylyǵynda óndiristik qýaty 32,7 myń tonna et shyǵaratyn 13 bordaqylaý alańyn, jalpy qýaty 25,5 myń tonna sút ónimin beretin 4 taýarlyq sút fermasyn salý josparlanýda. Sondaı-aq, jalpy qýaty 61,2 myń tonna qus etin óndiretin 3 qus fabrıkasyn jáne qýaty 81,6 myń tonna et ónimderin óńdeıtin 6 zaýytty iske qosý josparlandy. Budan basqa, Jol kartasy aıasynda veterınarııalyq preparattar shyǵaratyn zaýyt salý josparlanyp otyr», - dedi AShM ókili.