Túrkistanda úzdik stýdentterge Beısen Quranbek atyndaǵy stıpendııa tabystaldy

TÚRKІSTAN. QazAqparat - Búgin Qoja Ahmet ıAsaýı atyndaǵy HQTÝ-diń jýrnalıstıka kafedrasynyń úsh úzdik stýdentine talantty jýrnalıst Beısen Quranbek atyndaǵy stıpendııa saltanatty túrde tabystaldy, dep habarlaıdy QazAqparat Túrkistan oblysy ákiminiń baspasóz qyzmetine siltememen.

Stıpendııany Qazaqstan Jýrnalıster odaǵynyń Túrkistan oblystyq fılıalynyń tóraǵasy, oblystyq máslıhat depýtaty Ǵalymjan Elshibaı tapsyrdy.

Sharaǵa Qoja Ahmet ıAsaýı atyndaǵy HQTÝ-niń rektory Janar Temirbekova, elimizge tanymal telejýrnalıst Ábdez Rahmanuly jáne bir top oblystyq máslıhat depýttatary men BAQ ókilderi qatysty.

Іs-sharada sóz alǵan oqý ornynyń jańa basshysy Janar Amangeldiqyzy ozat stýdentterge qoldaý bildirip, shabyt syılaǵan odaq tóraǵasyna shynaıy alǵysyn bildirdi. Sondaı-aq ol aldaǵy ýaqytta oblystyq jýrnalıster odaǵymen birge yntymaqtastyqta jumys isteýge múddeli ekenin jetkizdi.

Óz kezeginde sóz alǵan Qazaqstan Jýrnalıster odaǵynyń Túrkistan oblystyq fılıalynyń tóraǵasy, oblystyq máslıhat depýtaty Ǵalymjan Elshibaı marqum Beısen Quranbek týraly keńinen sóz qozǵap, onyń qazaq jýrnalıstıkasyna qosqan úlesin tilge tıek etti.

«Talantty jýrnalıst Beısen Quranbekpen bir grýppada bilim aldyq. Dos boldyq. Beısen eńbek jolyn sport gazetinen bastap, barlyq satylardan ótken óte tájirıbeli naǵyz jýrnalıst edi. Onyń qazaq jýrnalıstıkasyna qosqan úlesi orasan. Bir ǵana «Aıtýǵa ońaı», «Qaraket» syndy tok-shoýlary eldiń ystyq yqylasyna bólindi. Alaıda Beısenniń ǵumyry tym qysqa boldy. Allanyń buıryǵy shyǵar. Endeshe búgingi Beısen atyndaǵy stependııany ıelenip otyrǵan ini-qaryndastarymyzǵa dosymyzdyń ǵumyryn emes, taǵdyryn emes, talantyn, eńbeksúıgishtigin, adaldyǵyn bersin dep tileımiz», - dedi Ǵalymjan Qamytbekuly.

Shara barysynda Beısenniń áriptesteri men dostary estelikter aıtyp, stýdentterge aqyl-keńesterin berdi.