Túrkistanda túrki áleminiń qaıratkeri Adnan Menderestiń esimimen kóshe ataldy

TÚRKІSTAN. QazAqparat - Túrkistandaǵy kóshelerdiń birine túrki álemine tanymal qaıratker Adnan Menderestiń aty berildi. Búgin osy aıtýly oqıǵaǵa baılanysty saltanatty jıyn ótip, oǵan Qazaqstan, Túrkııa jáne ózge de elderden meımandar qatysty, dep habarlaıdy QazAqparat tilshisi.

Sharaǵa qatysqan qonaqtar men zııaly qaýym ókilderi A.Menderes týraly baıandap ótti. Túrkııa Respýblıkasy Din isteri basqarmasynyń basshysy, Bas múftı Alı Erbash tarıhı tulǵaǵa qurmet kórsetken qazaq eline alǵysyn bildirip, Túrkistannyń Túrki áleminiń ortalyǵyna aınalyp kele jatqanyna toqtaldy. Ol qos el arasyndaǵy baýyrlastyq qarym-qatynas nyǵaıa túskenin, Túrkistan tórindegi mańyzdy is-sharalar Túrki álemin biriktirýge serpin beretinin málim etti.

Al óńir basshysy Ómirzaq Shókeev baýyrlas Qazaqstan men Túrkııa baılanysy tereńdep otyrǵanyn jetkizdi.

«Ótken ǵasyrdyń 50-jyldary otandastyrymyzǵa qamqorlyq tanytyp, Túrkııaǵa kóshýine, ornyǵýyna úles qosqan Adnan Menderestiń esimin jańǵyrtý qos memleketke ortaq múdde dep bilemin. Memleket basshysy Qasym-Jomart Toqaev Túrkistan qalasyndaǵy kóshelerdiń birine Adnan Menderestiń esimin berý týraly tapsyrma bergen bolatyn. Tapsyrma aıasynda zańǵa sáıkes tıisti jumystar atqarylyp, biz búgin sol kósheniń ashylý saltanatyna kýá bolyp otyrmyz. Ózderińizge belgili, Túrkistan – bir halyqtyń ǵana emes, kúlli Túrki elderiniń rýhanı ustyny retinde áspetteledi. Sondyqtan, qos elge ortaq tulǵanyń atyndaǵy bul kósheniń Túrkistan qalasynda ashylýy – zańdylyq. Sondaı-aq bul bastama qazaq-túrik arasyndaǵy dostyqtyń odan saıyn nyǵaıýyna jol ashady dep senemin», – dedi Ómirzaq Shókeev.

Adnan Menderes kóshesinde jańadan boı kótergen ákimshilik-iskerlik ortalyq, áleýmettik, kásipkerlik nysandar, turǵyn úıler jáne jańa mektep ornalasqan. Sonymen birge saıabaq pen mádenı nysandar da bar. Aıta keteıik, saıası qaıratker, Túrkııa Respýblıkasynyń Premer-Mınıstri qyzmetin atqarǵan Adnan Menderestiń qazaq halqyna sińirgen eńbegi mol. Ol ótken ǵasyrdyń 50-shi jyldary qazaqtardyń Túrkııaǵa qonystanýyna sebepker bolyp, 4 jylǵa jýyq sozylǵan qonys aýdarý protsesine qoldaý kórsetti. Tarıhı tulǵanyń 1952 jylǵy qaýlysynan keıin qazaqtar Pákistannan Túrkııaǵa qonys aýdara bastady. Pákistandaǵy qazaqtardyń alǵashqy legi 1952 jyldyń qyrkúıek aıynda kelse, sońǵy legi 1956 jyly túrik jerine jetken.