Túrkistanda tuńǵysh ret ımamdar saıabaǵy ashylady

TÚRKІSTAN. QazAqparat - Qasıetti Ramazan aıynda Túrkistan qalasynda ımamdar saıabaǵy ashylady. Bul týraly Túrkistan qalasynyń bas ımamy Muhammedjan Jumadýllaev málimdedi, dep habarlaıdy QazAqparat tilshisi.

Jańa saıabaq Ramazan aıynyń alǵashqy onkúndiginde paıdalanýǵa berilmek. Onda ıslam dininiń keń taralýyna úles qosqan el azamattarynyń esimderi jazylǵan taqtaıshalar ornatylatyn bolady. Sondaı-aq, olar týraly arnaıy kitap jaryq kórip, as beriledi.

«Kóptegen sharýany halyqpen, elmen birge atqaryp kele jatyrmyz. Ótken jylǵy Ramazan aıynda QMDB «Zeket» qaıyrymdylyq qory arqyly turǵyn úıge muqtaj otbasylarǵa 16 úı berilgen bolatyn. Bıyl bul kórsetkishti kóbeıtýdi josparlap otyrmyz. Sonymen qatar azyq-túlikpen qamtý da josparymyzda bar», - dedi Muhammedjan Jumadýllaev.

Qazirgi tańda Túrkistan qalasynda 33 meshit, 28 namazhana bar. Odan bólek, Túrkistanǵa tartý retinde Ózbekstan eli úlken meshittiń qurylysyn júrgizip jatyr. Olda jyl sońyna deıin paıdalanýǵa beriledi dep josparlanyp otyr.