Túrkistanda Tuńǵysh Prezıdent kúnine oraı stýdentterge arnaıy dáris oqyldy
Halyqaralyq Qazaq-Túrik ýnıversıtetinde ótken dáris barysynda Elbasy Nursultan Nazarbaevtyń memleket bolashaǵy jolynda atqarǵan isteri men qol jetkizgen jetistikteri sóz boldy, dep habarlaıdy QazAqparat tilshisi.
Lektsııalar bir mezgilde bes sektsııada oqyldy. Onda Ardagerler Keńesiniń tóraǵasy Jeńisbek Máýlenqulov, Túrkistan qalasynyń ákimi Rashıd Aıýpov, ýnıversıttiń ǵalym-ustazdary Seıdýlla Sadyqov,Tálib Jumanov, Rashıd Ibragımovtar Elbasynyń eren eńbekteri men elimizdiń búgingi jetken jetistikterin jastarǵa tanytyp, qundy derektermen bólisti. Bul merekeniń mańyzy men mánine toqtaldy.
Oblystyq ardagerler keńesiniń tóraǵasy Jeńisbek Máýlenqulov stýdentterge Tuńǵysh Prezıdentimiz N.Nazarbaevtyń ǵasyrǵa tatyrlyq isteri men Qazaqstannyń mártebesin tórtkúl dúnıege tanytý úshin jasaǵan eren eńbekteri jóninde keńinen áńgimeledi. Keleshekti bilý úshin tarıhymyzdy taný qajettigine nazar aýdardy. Táýelsizdik jyldarynda qoǵamnyń bir formatsııadan ekinshi formatsııaǵa ótý barysyndaǵy Elbasynyń kóregendiliginiń arqasynda mańyzdy sheshimder qabyldaýy utymdy jaǵdaı bolǵandyǵyn aıtyp ótti.
Búginde elimiz damýdyń dańǵylyna túse otyryp, álemniń damyǵan 30 eliniń qatarynan oıyp turyp oryn alýǵa umtylǵan edi. Bul belestiń de, odan da zor asýlardyń da baǵyndyrylatyndyǵy sózsiz. Oǵan Elbasymyzdyń bastamasymen qabyldanǵan «Qazaqstan-2050» strategııasy, «Nurly jol» baǵdarlamasy, «100 naqty qadam» ult jospary óz septigin tıgizeri anyq.
Túrkistan qalasynyń ákimi Rashıd Aıýpov bolsa stýdenttermen kezdesip, Tuńǵysh prezıdenttiń eldi damytý jolyndaǵy eńbekteri týraly aıtty. Túrkistan qalasynyń oblys ortalyǵy bolýynyń mańyzy men aldaǵy atqarylar sharalarda jastardyń úlesi týraly atap ótti.
Olardy qalanyń damýyna úles qosýǵa shaqyrdy jáne jáne Jastar jylyna oraı jasalatyn jobalar týraly aqparat berdi. Týrızm salasynynyń damýyna atsalysyp, meıramhana jáne qonaqúı júıesin álemdik deńgeıge kóterý maqsatynda jobalaryn usynýdy tapsyrdy. Ǵylym bar jerde damý bar demekshi osy ýnıversıtetpen birigip oblysqa qajetti kadrlardy daıyndap kóptegen jobalar jasalý kerektigin eskertti.
Arnaıy dáristerdiń sońynda stýdentter túrli suraqtar qoıyp, jaýaptar aldy.