Túrkistanda Shámshi Qaldaıaqovqa eskertkish ornatyldy
Eskertkish «Aqjaıyq» mýzyka mektebiniń aldynda oryn tepti.
Kompozıtsııanyń ashylý saltanatyna oblys ákimi Ómirzaq Shókeev, QR Parlamenti Senatynyń depýtaty Álimjan Qurtaev, Halyqaralyq «Alash» ádebı syılyǵynyń laýreaty Kópen Ámirbek, mýzykalyq prodıýser Qaldybek Qurmanalıev, «Sh.Qaldaıaqov» poıyzymen Almatydan arnaıy kelgen qonaqtar, zııaly qaýym ókilderi men jýrnalıster qatysty.
«Túrkistan oblysy – qazaq dalasyna qanshama daryndy syılaǵan kıeli meken. Ánimen keń dalany terbetip, «qazaq valsiniń koroli» atanǵan, Qazaqstan Respýblıkasy Ánuranynyń avtory Shámshi Qaldaıaqovtyń bıyl týǵanyna 90 jyl tolyp otyr. Otyrarda týyp, án padıshahy atanǵan, qaıtalanbas daryn ıesiniń esimin ulyqtaý – bizge artylǵan abyroıly mindet. Túrkistan qalasynyń jańa ortalyǵynda boı kótergen kompozıtordyń eskertkishi – oblys jurtshylyǵyna, qazaq eline mereke qarsańynda tamasha tartý bolyp otyr», - dedi oblys ákimi.
Demeýshiler esebinen qarjylandyrylǵan eskertkish qoladan quıylǵan. Bıiktigi – 2,5 metr, uzyndyǵy – 3,5 metr. Avtory – Qazaqstannyń Eńbek sińirgen óner qaıratkeri, kásibı sheber músinshi Tileýberdi Bınashev.
Kompozıtsııada Qaldaıaqovtyń shyǵarmashylyq oı ústinde otyrǵan sáti beınelengen.
«Sazger beınesiniń jas jetkinshekterdi ónerge, mádenıetke baýlıtyn «Aqjaıyq» mýzyka mektebiniń aýlasynda boı kóterýi – zańdylyq. Halyqtyń sýretke túsýine, jaqynyraq kelip kórýine yńǵaıly.
Qazaq rýhanııatynyń jandanýyna ólsheýsiz úles qosyp, búkil qazaq jerin terbetken Shámshi beınesi jas ónerpazdardy izgilikke baǵyttaıtyn baǵdary bolary sózsiz. Túrki jurtynyń rýhanı astanasy – Túrkistan qalasynda daryndy tulǵalardyń esimi ulyqtalýy – qazaq rýhanııatyndaǵy ilkimdi istiń biri», - dedi Túrkistan oblysy ákiminiń baspasóz qyzmetinen.