Túrkistanda sáýleti erekshe eńseli meshit boı kóteredi
Túrkistan qalasyna kireberiste álemdegi ozyq tájirıbelerdi ushtastyrǵan eńseli meshit boı kóteredi. Úkimet basshysy Asqar Mamın Túrkistan oblysyna sapary barysynda oblys ákimi Ómirzaq Shókeevpen birge Ózbekstan ókilderiniń qatysýymen Islam ortalyǵynyń irgetasyn qalady. Sáýleti erekshe Islam ortalyǵynyń ishki jáne syrtqy bezendirilýi shyǵystyq naqyshta júrgizilmek. Meshit aldaǵy 2020 jyly ashylady.
«Táýelsizdik kúni qarsańynda qolǵa alynǵan jańa joba jan-jaqty zerdelengen. Álem elderindegi ozyq tájirıbeler de eskerilgen. Meshit irgesiniń berik bolýy úshin ózindik tehnologııa ázirlendi. Túrki áleminiń rýhanı temirqazyǵy, qasıetti Túrkistan qalasynda salynatyn jańa ǵıbadat ornynda 5 myń jamaǵat bir mezgilde sájdege bas tıgizip, qulshylyq ete alady. Meshit qurylysy zaman talabyna saı ozyq úlgide júrgizilmek. Islam ortalyǵynyń jalpy aýmaǵy – 20 000 sharshy metr» delingen habarlamada.
«Bul – baýyrlas eki el arasynda júzege asyrylyp jatqan ıgiligi mol, ortaq joba. Dinı ǵımarat Uly Jibek joly boıy men kóne shaharǵa keletin týrısterdiń qyzyǵýshylyǵyn arttyratyn taǵy bir úlken nysany bolady. Jalpy, Qazaqstan men Ózbekstan qarym-qatynasynyń áleýeti zor. Yntymaqtastyǵymyz kúnnen-kúnge nyǵaıyp, eki el arasyn jaqyndastyra beretinine senimdimin. Allanyń raqymy úshin jasalǵan jumystyń dúıim elge paıdasy da mol bolsyn. Biregeı jobaǵa qoldaý kórsetken Ózbekstan Respýblıkasynyń Prezıdenti Shavkat Mırzıeevke rızashylyǵymdy bildiremin», – dep tilektestigin bildirdi Túrkistan oblysynyń ákimi Ómirzaq Shókeev.
Ózbekstan Respýblıkasy resmı ókilderiniń málimetinshe, aýqymdy jobaǵa qurylys pen sáýlet salasynyń eń úzdik maıtalmandary atsalysady.
Meshitte musylmandyq joralardy jasaıtyn oryndar, kongress-holl, neke saraıy, 400 oryndyq medrese, kitaphana, ashana salynady.