Túrkistanda «Sattar Erýbaev» atyndaǵy shyǵarmashyl jastardy qoldaý qory ashyldy

TÚRKІSTAN. QazAqparat - Túrkistan qalasynda «Sattar Erýbaev» atyndaǵy shyǵarmashyl jastardy qoldaý qory ashyldy. Atalǵan qor jylyna bir ret respýblıkamyzdaǵy eń úzdik shyǵarmashyl jastardyń Túrkistan ólkesinde basyn qosyp, shyǵarmashyl jastardy marapattaıtyn bolady, dep habarlaıdy QazAqparat tilshisi.

Jastar resýrstyq ortalyǵynyń uıytqy bolýymen ashylǵan qor poezııa, dástúrli án, roman, proza, áńgime, aıtys, ǵylym, qolóner, zergerlik óner jáne ulttyq úlgidegi kıim dızaıny boıynsha​ nomınatsııalarynyń ıelerin arnaıy komıssııa arqyly anyqtap, qarjylaı júldelermen marapattaıdy dep josparlanǵan. Atalmysh ıdeıanyń bastamasy retinde byltyr oblys deńgeıinde «Sattar Erýbaev atyndaǵy shyǵarmashyl jastar baıqaýy»​ ótken bolatyn.​ Baıqaý ádebıet pen mádenıettiń 8 baǵytyn qamtyǵan. Atap aıtsaq, «Úzdik​ jas músinshi», «Úzdik jas dızaıner», «Úzdik jas qolónershi», «Úzdik jas ǵalym», «Úzdik jas ánshi», «Úzdik jas ǵalym», «Úzdik jas aıtysker» nomınatsııalary boıynsha Túrkistan oblysynyń túkpir-túkpirindegi ónerli jastardyń arasynda básekege toly baıqaý kópshiliktiń kóńilinen shyqty.

Igi bastama Respýblıka kóleminde ult rýhanııatyna eńbek sińirip júrgen jas shyǵarmashyl jastarymyzǵa qoldaý kórsetý maqsatynda​ «Sattar Erýbaev» atyndaǵy shyǵarmashyl jastardy qoldaý qoryn qurýmen jalǵasyp otyr. Jańadan qurylǵan qordyń tóraǵasy​ Aıbek Maratuly osy ýaqytqa deıingi atqarylǵan jumystar barysy men aldaǵy ýaqyttaǵy jumys josparymen tanystyrdy. Qaıyrymdylyq baldyń ózge sharalardan ereksheligi – Túrkistan óńirine belgili qolónershi Mamyt Jańabek qolynan shyqqan músinderi jáne sýretshi Ádilhan Máliktiń sýretteri​ aýktsıonǵa qoıyldy. Jas talanttardyń alǵashqy qoldaýshysy retinde keshke arnaıy oblystyq, qalalyq máslıhat depýttary, jeke kásipkerler, zııaly qaýym ókilderi men memlekettik qyzmetkerler jáne ónerpaz azamattar​ qatysty.

«Bıyl 2021 jyl «Qaıyrymdy ister jyly» sanalady. Qaıyrymdy is tek qana materıaldyq kómekpen nemese azyq-túlik taratýmen shektelmeıdi. Onyń aýqymy keń. Biz el ishindegi ulttyq dástúrdi óltirmeı jáne óner men ádebıetti dáriptep kele jatqan shyǵarmashyl jastarǵa qoldaý kórsetkimiz keledi. Túrkistan sóz júzinde ǵana emes, is júzinde de rýhanı ortalyqqa aınalýy tıis. Qordyń esimi Sattardyń esimimen atalyp, jańarǵan Túrkistanda jańa ambıtsııaǵa ıe bolǵan bul joba elimizdiń túkpir-túkpirin sharlaıdy», – deıdi oblystyq «Jastar resýrstyq ortalyǵynyń» basshysy, oblystyq máslıhat depýtaty Amalbek Ómirtaı.