Túrkistanda «Rýhanı jańǵyrý» baǵdarlamasy aıasynda jazylǵan mıýzıkldiń premerasy ótti

TÚRKІSTAN. QazAqparat - Túrkistanda Elbasynyń «Rýhanı jańǵyrý» baǵdarlamasy aıasynda jazylǵan  «Mahabbat munarasy» mıýzıkliniń premerasy ótti. Týyndy oblystyq Mádenıet jáne tilderdi damytý basqarmasy men oblystyq Opera jáne balet teatrynyń uıymdastyrýymen alǵash ret qoıyldy, dep habarlaıdy QazAqparat tilshisi.

Mıýzıkldiń áýenin jazǵan - Maqtaaral aýdanynyń týmasy, kompozıtor, respýblıkalyq jáne halyqaralyq baıqaýlardyń jeńimpazy Svetlana Ahmetova. Mýzykasyn óńdegen - Báıdibek aýdanynyń týmasy, kompozıtor, respýblıkalyq jáne halyqaralyq baıqaýlardyń jeńimpazy Rýslan Shynyqulov. Al mıýzıkldiń sózin jazǵan - jas aqyn Muqaǵalı Kenjetaıuly. Mýzykalyq jetekshisi, teatr dırektory - QR Mádenıet qaıratkeri Ábdihan Nurmahanbetov. Qoıýshy-rejısseri - Elik Nursultan, qoıýshy-baletmeıster - Gúljan Dáýletqulova, qoıýshy-sýretshi - Dáýletııar Baltabaev bolsa, kórkemdik jetekshisi - Erlan Jandarbaı.

Basty keıipkerlerdi somdaǵandar Áıgerim Jumabek, Mádihan Dúıseev, Aıbek Qanatbek, Kúnaıym Ismaılova, Aıdar Baıymbetov, Marjan Sháriphan, Baqytjan Tursymanov syndy teatrdyń jas ári tájirıbeli ártisteri. Qoıylym bastalar aldynda oblys ákimi Janseıit Túımebaev quttyqtaý sóz sóılep, teatr ujymyna shyǵarmashylyq tabystar tiledi. Talantymen talaıdy tánti etken ónerpazdardyń ónerine óńir basshysy óz rızashylyǵyn bildirdi.

«Premerany tamashalaýǵa qala turǵyndarynyń, ásirese jastardyń kóptep kelýi kóńilge qýanysh syılaıdy. Bul halqymyzdyń tyń dúnıege qyzyǵýshylyq tanytyp, mádenıetimizdiń órkendegeniniń dáleli ispetti. Astana qalasynda qoıylǵan mıýzıkl jańa oblys ortalyǵynda tuńǵysh ret sahnalanýda. Eki kórinisten turatyn týyndy teatr repertýaryndaǵy úzdik qoıylymdardyń birine aınalaryna senimim kámil. Rýhanı qundylyǵy mol mundaı dúnıelerdiń jandanýyna qoldaý bildirip, nasıhattalýyn qolǵa alýymyz qajet. Sondyqtan da til men ultqa bólinbeıtin kıeli óner ulandarynyń ónerin shetelge tanytýdy da basty nazarǵa alyp, elimizdiń mereıin osy arqyly asqaqtatýǵa qadam jasaýǵa bolady. Ulttyq ónerdi damytýǵa úles qosyp, halyqtyń alǵysyna bólený jolyndaǵy eńbekterińiz eselene bersin», - dedi Janseıit Túımebaev.

Aıta keteıik, mahabbat lırıkasy beınelengen týyndyny sahnalaýǵa teatrdyń 60-tan astam ártisi kúsh saldy. Adaldyq pen batyldyq, qyzǵanysh pen kúres kórinisteri sýrettelgen qoıylym kórermender kóńilinen shyǵyp, zor qoshemetke ıe boldy.