Túrkistanda ótip jatqan «Tartyl fest» festıvaline 3 egizder juby qatysty

TÚRKІSTAN. QazAqparat – «Tartyl Fest» týrnıkke tartylý boıynsha respýblıkalyq sport festıvali búgin Túrkistanda ótip jatyr, dep habarlaıdy QazAqparat tilshisi.

Іs-sharany Túrkistan qalasy ákiminiń orynbasary Erlan Kúzembaev pen joba ambassadory, qoǵam qaıratkeri, jattyqtyrýshy ári akter Aıtym Jaqypov ashyp, qatysýshylarǵa sáttilik tiledi.

«Dara» daryndylardy qoldaý qorynyń uıymdastyrýymen jáne Túrkistan oblysy ákimdiginiń qoldaýymen ótip jatqan festıvalge 270-ke jýyq adam qatysty. Olardyń ishinde 3 egizder juby bar: Hasan men Hýsan, Hýsan men Hasan jáne Nurasyl men Erasyl.

Sondaı-aq, jasy 70-ti alqymdaǵan aqsaqal Dadajan Karımov nemeresi Nursultandy arnaıy ertip kelipti. Qarııa 10 ret, nemeresi 5 ret týrnıkke tartylyp, kópshiliktiń yqylasyna bólendi.

«Bizdiń aýlada sporttyq qurylǵylar qoıylǵan. Kúndelikti tartylyp, buqaralyq sportpen shuǵyldanamyz. Bul - bizdiń úırenshikti isimiz. Kópshilikti sportpen aınalysýǵa shaqyramyn. Іs-sharany uıymdastyrýshylarǵa kóp rahmet», - dedi aqsaqal.