Túrkistanda «Ordabasy - birliktiń týy» anımatsııalyq fılminiń tanystyrylymy ótti

TÚRKІSTAN.QazAqparat - Túrkistan qalasynda «Ordabasy - birliktiń týy» anımatsııalyq fılminiń tanystyrylymy ótti. Oǵan zııaly qaýym ókilderi, óńir qalamgerleri men jastar qatysty, dep habarlaıdy QazAqparat tilshisi.

Aıta keteıik, ótken jyly Ordabasy taýyndaǵy úsh el Prezıdentteriniń tarıhı kezdesýine jáne «Ordabasy» ulttyq tarıhı-mádenı jáne tabıǵı qoryǵyn» qurý týraly Elbasy Jarlyǵynyń shyqqanyna 25 jyl tolǵan bolatyn. Osyǵan oraı Túrkistan oblysy ákimdigi «Saq» kınostýdııasyna tapsyrys berip, túsirildi.

«Rýhanı jańǵyrý» baǵdarlamasy aıasynda daıyndalǵan anımatsııalyq týyndyda Uly dalany meken etken uly tulǵalar men danalardyń erligi men adaldyq, danyshpandyq qasıetterin baıandalady. Sondaı-aq, el qorǵaǵan bahadúrlerimizdiń erlikteri, eldiń birligi sýrettelgen.

Asyljan esimdi balaqaıdyń elin, jerin qorǵaýǵa degen umtylysy arqyly tarıhı oqıǵany jas urpaq sanasyna sińirý kózdelgen. Oqıǵa jelisinde qazaqtyń Tóle, Qazybek, Áıteke bıleri bastap, Bógenbaı, Qabanbaı, Naýryzbaı sekildi batyrlary qoshtap, Ordabasyda úsh júzdiń basyn qosyp, sheshýshi aıqasta jaýdy jeńgen tustary kórinis tabady. Fılmniń rejısseri Batyrhan Dáýrenbekov búldirshinderdi otanshyldyqqa shaqyratyn mundaı týyndylar aldaǵy ýaqytta da túsirile beretinin jetkizdi.

Jalpy Túrkistan oblysynda «Rýhanı jańǵyrý» baǵdarlamasy aıasynda birqatar kórkem jáne anımatsııalyq fılmder túsirildi. Oblys ákimdiginiń qoldaýymen «Saq» kınostýdııasy «Kúsh atasy - Qajymuqan», «Otyrardy qorǵaý», «Kıeli Qazyǵurt» anımatsııalyq fılmderin jáne «Kóne jetigenniń syry» telehıkaıasy men «Uly Jibek Joly boıyndaǵy kóne qalalar» derekti fılmin jurtshylyq nazaryna usynǵan bolatyn. Sonymen birge, «Oqsyz oqıǵasy» anımatsııalyq fılmi men «Tóle bı» atty 10 serııaly kınohıkaıasy da jýyq arada kórermenge jol tartady.