Túrkistanda «Ordabasy - birlik týy» anımatsııalyq fılmi jaryqqa shyǵady

TÚRKІSTAN. QazAqparat -  Elbasy N.Nazarbaevtyń «Uly dalanyń jeti qyry» atty maqalasyna oraı Túrkistan oblysynyń Óńirlik kommýnıkatsııalyq qyzmetinde baspasóz máslıhaty ótti. Brıfıngke qatysqan «Saq» kınostýdııasynyń dırektory Nurıddın Pátteev Prezıdent maqalasyndaǵy qoıylǵan maqsattar tóńireginde Túrkistan oblysynda júzege asqan jobalarǵa toqtaldy, dep habarlaıdy QazAqparat tilshisi.

Nurıddın Pátteevtiń sózinshe, ótken jyly óńirde oblys ákimi Janseıit Túımebaevtyń qoldaýymen «Kóne jetigenniń syry» atty 10 serııaly telehıkaıa túsirilgen.

«Rýhanı jańǵyrý» baǵdarlamasy aıasynda túsirilgen týyndylar kórermen qaýymǵa usynyldy. Budan ózge, «Kıeli Qazyǵurt»,  «Otyrardy qorǵaý», «Kúsh atasy - Qajymuqan», «Báıdibek bı» atty anımatsııalyq fılmder respýblıkalyq jáne jergilikti telearnalarda kórsetildi. Sondaı-aq, «Uly Jibek jolyndaǵy eskertkishter» atty derekti fılm taspalanyp, kópshilik tamashalap úlgerdi», - dedi Nurıddın Pátteev.

Aıta keteıik,  Memleket basshysynyń «Uly dalanyń jeti qyry» maqalasynda týǵan jer men tulǵalardy tanytatyn kıno jáne anımatsııalyq týyndylar túsirý qajettigi aıtylǵan bolatyn.

«Jalpy, halyqtyń sanasynda fılmderdegi jarqyn kınoobrazdar irgeli ǵylymı monografııalardaǵy derekti portretterden góri mańyzdyraq ról atqarady.  Sondyqtan, tez arada Qazaqstannyń órkenıet tarıhynyń úzdiksiz damýyn kórsetetin derekti-qoıylymdyq fılmderdiń, televızııalyq serıaldar men tolyqmetrajdy kórkem kartınalardyń arnaıy tsıklyn óndiriske engizý kerek. Ult qaharmandaryn úlgi tutý úrdisin qalyptastyrýǵa jol ashatyn sapaly balalar fılmderi men mýltıplıkatsııalyq serıaldardy asa qajet etetin óskeleń urpaqtyń da talǵamyna erekshe nazar aýdarý kerek. Bizdiń dańqty batyrlarymyz, oıshyldarymyz ben el bıleýshilerimiz - tek Qazaqstan ǵana emes, sondaı-aq búkil álem boıynsha elikteýge laıyqty tulǵalar» dep atap kórsetken.

Bul rette aǵymdaǵy jyly oblys basshysynyń  qoldaýymen óńirde «Ordabasy - birlik týy» atty anımatsııalyq fılmniń túsirilimi aıaqtalyp, tusaýkeseri josparlanýda. Sonymen qatar, «Túrkistan», «Oqsyz» anımatsııalyq fılmderi men «Tóle bı» teleserıalynyń túsirilim jumystary jalǵasyp jatyr.