Túrkistanda óńirge tanymal birqatar azamat «Nur Otan» partııasy qataryna qosyldy
Saltanatty jıynda «Nur Otan» partııasy Túrkistan oblystyq fılıaly tóraǵasynyń birinshi orynbasary Beısenbaı Tájibaev kópshilikti merekemen quttyqtady, dep habarlaıdy QazAqparat tilshisi.
Fılıal tóraǵasynyń birinshi orynbasary Elbasy Nursultan Nazarbaevtyń Qazaqstandy damytý jolyndaǵy eńbegine toqtaldy.
«QR Tuńǵysh Prezıdenti kúniniń tutas elimiz úshin máni bar dep esepteımin. Sebebi, memleketimizdiń damýynda Elbasy Nursultan Nazarbaevtyń eńbegi zor. Men Elbasynyń shekarany tolyq shegendeý, elordany salý, ıadrolyq qarýdan bas tartý, qazaq tiliniń mártebesin kóterý jáne Túrkistan oblysyn qurý týraly 5 eńbegin erekshe atap ótkim keledi. Elbasymyzdyń Túrkistandy damytý, túrki áleminiń rýhanı-mádenı ortalyǵyna aınaldyrý baǵytyndaǵy bastamasy tarıhta qalatyny anyq. Jýyrda partııa tóraǵasy, Elbasy partııany jańǵyrtý, elge adal qyzmet etý, ózekti máselelerdi sheshýge atsalysý jóninde tapsyrma berdi. Ol úshin partııa músheleri shynaıy janashyrlyqpen jumys isteýi kerektigin aıtty. Osyǵan baılanysty jigerli, jalyndy, otanshyl azamattardy qabyldaýǵa basymdyq beriledi. Bıyl partııamen baılanysyn úzgen 3 myńnan astam adam partııa qatarynan shyǵarylyp, 2407 adam jańadan qabyldandy», – dedi B.Tájibaev.
Sondaı-aq partııa qataryna jańadan qabyldanǵan 20-ǵa jýyq azamatqa partııa bıletterin tapsyrdy. Olardyń arasynda kópbalaly analar, jastar, tanymal jýrnalıster, ÚEU músheleri, kásipkerler, ustazdar, dárigerler jáne ózge de salanyń ókilderi bar. Túrkistannyń damýyna úles qosyp júrgen túrli sala ókilderi, tanymal adamdar da partbıletke ıe boldy. Máselen, dańqty kókparshy, aýdaryspaq sportynyń sheberi, bilikti bapker Janysbek Saev ta resmı túrde partııaǵa qabyldanyp, bıletin aldy. Bokstan álem chempıonatynyń qola júldegeri, ulttyq qurama boksshysy Sáken Bıbosynov ta bıyl «Nur Otan» partııasynyń sapyna qosyldy. Oqý-jattyǵý jıynynda júrgen órenge partııa bıleti arnaıy tapsyrylatyn bolady.
Bul kúni sonymen qatar oblys kóleminde jańadan ashylǵan 10 bastaýysh partııa uıymy jetekshilerine de kýálikter tapsyryldy. Atap aıtsaq, Túrkistan qalasynan 5, Saryaǵash aýdanynan 2 jáne Jetisaı, Qazyǵurt, Ordabasy aýdandarynan da bastaýysh partııa uıymdary ashyldy.
Merekelik jıynda partııanyń tanymal «Meniń týym, meniń Otanym!» aktsııasy aıasynda «Open Space» formatyndaǵy qoǵamdyq qabyldaý bólmesine Memlekettik Týdy ilý rásimi ótti. Jıynǵa qatysýshylar el múddesi jolynda adal ári sapaly qyzmet etetinderin aıtyp, Túrkistannyń, Qazaqstannyń jarqyn bolashaǵyna senimmen qaraıtyndaryn jetkizdi.
Aıta keteıik, búginde oblysta «Nur Otan» partııasynyń 88 myń múshe men 263 bastaýysh partııa uıymy bar. Mereke qarsańynda 1 myńnan astam adam partııa qataryna qabyldandy. Óńirde jańa kóshbasshylardy tabý, partııanyń jumysyn jandandyrý baǵytyndaǵy jumystar jalǵasyn tabady dep josparlanǵan.