Túrkistanda «Nur Otan» partııasynyń kezekti jıyny ótti

TÚRKІSTAN. QazAqparat - Túrkistan qalasynda «Nur Otan» partııasy oblystyq fılıalynyń kezekti HHHV konferentsııasy ótti, dep habarlaıdy QazAqparat tilshisi.

Jıynda Elbasy N.Á.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýyn nasıhattaý sharalary men «Nur Otan» partııasy oblystyq fılıaly Saıası keńesi men baqylaý-tekserý komıssııasynyń 2017-2018 jyldary atqarǵan jumystary saralandy.

Basqosýǵa «Nur Otan» partııasynyń hatshysy Qanybek Jumashev pen oblys ákimi Janseıit Túımebaev, «Nur Otan» partııasy oblystyq fılıaly tóraǵasynyń birinshi orynbasary N.Joldasov pen oblystyq máslıhat hatshysy Qaırat Balabıev, partııa fılıalynyń saıası keńes músheleri men máslıhat depýtattary, memlekettik organdardyń basshylary jáne BAQ ókilderi qatysty. 

Aımaq basshysy Janseıit Túımebaev óz baıandamasynda Memleket basshysynyń Joldaýda júktegen tapsyrmalaryn oryndaýǵa baılanysty óńirde atqarylyp jatqan birqatar sharýalarǵa toqtaldy.

Óz kezeginde Túrkistan oblystyq ardagerler keńesiniń tóraǵasy Jeńisbek Máýlenqulov Joldaýdyń negizgi basymdyqtary týraly pikirin aıtty.

 «Memleket basshysynyń 2019 jyldy «Jastar jyly» dep jarııalaýy men pedagogtar mártebesi týraly qabyldanatyn jańa Zań halyq arasynda úlken qoldaýǵa ıe bolyp otyr. Óıtkeni, Elbasynyń bıylǵy Joldaýy búkil qazaqstandyqtardyń sapaly ómir súrýine negiz bola alady. Ardagerler uıymy Prezıdent qoıǵan mindetterdi halyqqa túsindirip, onyń naqty júzege asýyna barynsha atsalysatynyn aıtqym keledi», - dedi Jeńisbek Máýlenqulov.

 Sondaı-aq, jıyn barysynda Saıası keńes quramyna ózgerister engizilip, partııalyq baqylaý-tekserý komıssııasynyń quramy qaıta saılandy.