Túrkistanda mıgratsııalyq HQO ashyldy
Korporatsııa baspasóz qyzmetiniń málimetinshe, óńirdegi eńbek mıgranttary memlekettik qyzmetterdi halyqqa qyzmet kórsetý ortalyqtarynyń standartyna saı «bir tereze» qaǵıdaty boıynsha qyzmet ala alady. Bul elimizdegi kóshi-qon qyzmetterin kórsetetin on besinshi ortalyq.
Jańa ortalyqtyń ashylý saltanatyna Túrkistan oblysynyń ákimi Ómirzaq Shókeev, «Azamattarǵa arnalǵan úkimet» memlekettik korporatsııassynyń basqarma tóraıymynyń orynbasary Birjan Júnisov, Túrkistan oblystyq polıtsııa departamentiniń basshysy Qaırat Dálbekov qatysty.
«Buryn sheteldikter jumys isteýge ruqsat alý úshin birneshe kún túrli mekemeni aralaýǵa májbúr edi. Endi olar JSN alý, salyq tóleý, medıtsınalyq tekseristen, daktıloskopııadan ótý, saqtandyrý anyqtamasyna qol jetkizý sekildi qujattardy bir jerde, bir saǵattyń ishinde rásimdeý múmkindigine ıe boldy. Memlekettik qyzmetter belgilengen ýaqyt reglamentine saı elektrondyq kezek arqyly arnaıy jabdyqtalǵan jumys oryndarynda júzege asyrylady. Bul mıgranttar úshin ǵana emes, jumys berýshi úshin de óte qolaıly. Kóshi-qon ortalyǵynyń ashylýy jumys barysyn jeńildetip qana qoımaı, sybaılas jemqorlyq áreketteriniń de aldyn alady», - deıdi korporatsııanyń Túrkistan oblysy boıynsha fılıalynyń dırektory Erjan Jeńisbekov.
Sonymen qatar, bıyl aqpan aıynan bastap memlekettik korporatsııa mıgratsııalyq HQO arqyly kórsetiletin qyzmetter sanyn arttyrdy. Endi Qazaqstanǵa ýaqytsha keletin sheteldikter men azamattyǵy joq adamdar kóshi-qon qyzmetteri ortalyǵynyń qyzmetine júgine alady. Buǵan deıin bul qyzmet tek QR ІІM kóshi-qon komıteti tarapynan kórsetiletin.
Jańa qyzmet túrin paıdalaný úshin sheteldik kelesi qujattaryn usynýy tıis:
QR aımaǵyna kirýge vızasy bar sheteldiktiń ne azamattyǵy joq adamnyń jeke basyn kýálandyratyn jaramdy qujaty; shekarany kesip ótkeni týraly belgisi bar kóshi-qon kartasy; krkin túrde jazylǵan qoldaýhat.
Qyzmet alýshylar QR aımaǵyna 6 aıdan artyq merzimge keletin bolsa, qosymsha toltyrylǵan 2 mekenjaıǵa kelý paraǵyn, kelý paraǵyna toltyrylǵan statıstıkalyq esepke alý talony men 3,5*4,5 kólemindegi bir sýret tapsyrýy kerek.
Jańadan qosylǵan qyzmetten bólek, munda sheteldikter jumys isteýge ruqsat beretin qujatty alyp, QR aýmaǵyna ýaqytsha keletinder jeke sáıkestendirý nómirin rásimdeı alady.
Aıta ketý kerek, Túrkistan qalasynda bıylǵy jyldyń basynan beri mıgratsııa baǵyty boıynsha 6 700 qyzmet kórsetilgen.
Jańa front-ofıs Túrkistan qalasy 160 kvartal, № 209 ǵımaratta ornalasqan. Ortalyq dúısenbi-senbi kúnderi aralyǵynda 9:00-den 20:00-ge deıin jumys isteıdi.