Túrkistanda «Memlekettik til - meniń tilim» atty etnos jastarynyń forýmy ótti

TÚRKІSTAN. QazAqparat - Túrkistan gýmanıtarlyq-tehnıkalyq kolledjinde «Memlekettik til-meniń tilim» taqyrybynda etnos jastarynyń forýmy ótti. Sharaǵa memlekettik tildi jetik meńgergen etnos ókilderi men oblystyq assambleıa qurylymdary, etnomádenı birlestik tóraǵalary men músheleri, jastar qanaty men zııaly qaýym ókilderi qatysty, dep habarlaıdy QazAqparat tilshisi.

Jıyndy ashqan oblystyq Qazaqstan halqy Assambleıasy hatshylyǵy meńgerýshisiniń mindetin atqarýshy Madına Kamedenova memlekettik til - etnosaralyq kelisimdi nyǵaıtýdyń negizgi faktorlarynyń biri ekendigin aıtyp ótti. Aýqymdy sharanyń maqsatyn keń kólemde túsindirdi. Bıylǵy jyldyń jastarǵa arnalǵandyǵyn, bul baǵyttaǵy jumystar aldaǵy ýaqytta jandana túsetinin jetkizdi.

Sondaı-aq, koreı etnomádenı birlestiginiń janyndaǵy Jastar qanatynyń múshesi, 1 kýrs stýdenti Sabına Pak memlekettik til týraly pikirin bildirdi.

«Til - Táýelsizdiktiń aıǵaǵy, til men egemendik - egiz uǵym. Tilsiz-táýelsizdik, egemendiksiz - til bolmaıdy. Qazaq eli táýelsiz memleket bolyp ornaǵaly memlekettik til - qazaq tili dep jarııalandy. Bul tusta Elbasy Nursultan Nazarbaev «Qazaqtyń bolashaǵy - qazaq tilinde» dep aldymyzǵa aıqyn jol ashyp berdi. Bizge tek osy ustanymdy júzege asyrýǵa bar kúsh-jigerimizdi aıamaı, eńbek etý ǵana qaldy», - dedi Sabına Pak.

Forýmda ózbek etnomádenı birlestiginiń múshesi Rýstam Sattarov pen túrik etnomádenı birlestiginiń múshesi Ferıde Eıbova da túrki áleminiń jańa rýhanı ortalyǵy - Túrkistandy damytýǵa bar kúsh-jigerin jumsaıtyndyǵyn jetkizdi.