Túrkistanda memleketke qaıtarylatyn jer teliminiń baǵasy túsindirildi

TÚRKІSTAN. QazAqparat - Túrkistan oblysynyń ákimi Janseıit Túımebaev qala turǵyndaryn jeke máseleleri boıynsha qabyldap, memleket muqtajdyǵyna oraı memleketke qaıtarylatyn jer telimderi boıynsha  túsindirip ótti,  dep habarlaıdy QazAqparat tilshisi.

«Túrkistan - týrızm, túrki halyqtarynyń ortalyǵyna aınalsyn dep jatyrmyz. Ol úshin aınaladaǵy eski úılerdiń ornyna jańa ǵımarattar boı kóterýi kerek. Al burynǵy turǵyndarǵa naryqqa saı jyljymaıtyn múlkine qarjy, jer telimi ne baspana beriletin bolady», - dedi aımaq basshysy.

Óz kezeginde qala ákimi Álipbek Óserbaev ta jer telimi memleketke qaıtarylǵan turǵyndarǵa zańǵa sáıkes shyǵyny óteletinin atap ótti.

 «Barlyq turǵynǵa zań aıasynda jerdiń ár sotyǵyna 515 myń teńgeden beriledi. Sondaı-aq, turǵyn úıler bólek baǵalanyp, baǵasyna saı qarjy bólinedi», - dedi qala ákimi.

Aıta keteıik, jańa josparǵa sáıkes oblys ortalyǵyna aınalǵan Túrkistan qalasynda kóptegen qurylys nysandary salynbaq. Osyǵan oraı, sıtýatsııalyq syzbadaǵy 98 gektar jerdi quraıtyn ekinshi aımaqta «Rýhanı-mádenı ortalyq» salý josparlanǵan. Búginde memleket muqtajdyǵy úshin ondaǵy 171 nysannyń jer telimin (13 kásipkerlik, 158 turǵyn úı) qala ákiminiń qaýlysyna sáıkes jerdi qaıtarý jumystary júrgizilýde.

Turǵyndarǵa eskertý qaǵazdary berilip, atalǵan nysandarǵa akt toltyrylǵan. 165-nysannyń qujattary tolyq jınaqtalyp, baǵalaý jumystary júrip jatyr.  90 úıdiń baǵalaý jumystary tolyq aıaqtalyp,  33 úıdiń ıeleri kelisimin bergen. Al, jer telimderin qaıtarý  jáne baǵalaý jumystaryna kelispegen turǵyndarmen túsindirme jumystary júrgizilýde. Qala ákiminiń jáne tıisti bólim basshylarynyń, quqyq qorǵaý organdary men qalalyq prokýratýra ókilderiniń qatysýymen  májilis ótkizilip, jan-jaqty túsindirilýde. Narazylyq bildirgen turǵyndardyń ótinishterin qaraıtyn  29 adamnan quralǵan komıssııa jumys istep jatyr.