Túrkistanda memqyzmettiń 85 paıyzy elektrondy túrde kórsetiledi

TÚRKІSTAN. QazAqparat - Túrkistan oblysy boıynsha kórsetilgen qyzmetterdiń elektrondy túrdegi úlesi 85 paıyzdy qurady. Bul týraly búgin QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń basshysy Ǵalym Tursynbaev aıtty, dep habarlaıdy QazAqparat tilshisi.

«Qazirgi tańda Túrkistan oblysy boıynsha kórsetilgen qyzmetterdiń elektrondy túrdegi úlesi 85 paıyzdy qurady. Bul 2017 jylmen salystyrǵanda 31 paıyzǵa artyp, qyzmet alýshy men qyzmet berýshiler arasyndaǵy tikeleı baılanys 2 esege tómendedi», - dedi departament basshysy.

Ǵalym Tursynbaev sondaı-aq, atalǵan nátıjege qol jetkizý maqsatynda óńirdegi memlekettik jáne bıýdjettik mekemelerde 1290 «ózine-ózi qyzmet kórsetý buryshy» ashylyp, 5 053 ınformatıka páni muǵalimi oqytylǵanyn jetkizdi. Sonymen birge, 280 myńnan astam halyq úshin 975 oqytý jumystary uıymdastyrylyp, jármeńkeler ótkizilgen. Memlekettik qyzmet salasyndaǵy baqylaý baǵyty boıynsha Ádep jónindegi keńestiń 9 otyrysy ótkizilip, onda 114 másele qaralǵan. Onyń teń jartysy profılaktıkalyq máseleler bolsa, qalǵany tártiptik iske jatady.

Óz kezeginde departament basshysy, memlekettik kórsetiletin qyzmetter salasyndaǵy zańnamanyń saqtalýyna da qatań baqylaýdyń bar ekendigin atap aıtty.

«2018 jyly 67 tekserý júrgizilip, 2400 buzýshylyq anyqtalǵan. Sybaılas jemqorlyq profılaktıkasy baǵyty boıynsha 917 517 adamdy qamtyǵan 4 204 is-shara uıymdastyrylypty. Qoǵamdyq baqylaý kartasy aıasynda azamattardan aryz, shaǵym, usynystar qabyldaý maqsatynda Departamenttiń 8 775 869 21 21 Whats App jelisi ashylyp, oǵan azamattardan túsken 150-den asa aryz-shaǵymǵa jaýaptar berilgen. Al, oblys kóleminde 2018 jyldyń qorytyndysyna sáıkes memlekettik qyzmetshilerdiń taza aýysymdylyǵy - 3,2% quraǵan nemese 232 qyzmetshi óz erkimen jumystan ketken. Olardy oqytý sheńberinde 1461 memlekettik qyzmetshi oqytý kýrstarynan ótse, onyń 1114-i biliktiligin arttyryp, 347-si qaıta daıarlanypty. Memqyzmetkerlerdi mansaptyq joǵarylatý boıynsha ishki konkýrstar nátıjesinde 412 memlekettik qyzmetshi tómengi laýazymdardan joǵary laýazymdarǵa taǵaıyndalyp (JAO - 275, AO - 137), mansaptyq ósý kórsetkishi 74,5 % quraǵan»,- dedi Ǵalym Tursynbaev.