Túrkistanda «Mektepke jol» aktsııasy ótti

TÚRKІSTAN. QazAqparat - Búgin Túrkistan qalasynda «Mektepke jol» respýblıkalyq aktsııasy ótti. Atalǵan shara áleýmettik jaǵdaıy tómen, az qamtylǵan kópbalaly otbasylardy mektepke qajetti qural-jabdyqtarmen jabdyqtap, balalardy mektepke daıyndaý maqsatynda uıymdastyryldy, dep habarlaıdy QazAqparat tilshisi.

Shara aıasynda «Nur Otan» partııasy Túrkistan oblystyq fılıaly mektepke qajetti quraldardy jabdyqtaýǵa qarjylaı kómek kórsetti. Aktsııaǵa arnaıy qatysqan partııanyń fılıal tóraǵasynyń birinshi orynbasary Beısenbaı Tájibaev jas órenderge jańa oqý jyly tabysty ótsin degen tilegin jetkizdi.

Respýblıkalyq aktsııa aıasynda Túrkistan qalasyndaǵy jartylaı jetim, az qamtylǵan jáne kópbalaly otbasylardan shyqqan 50 bala kómekpen qamtyldy.

Oqýshylarǵa esep jáne jazba dápterleri, sýret salýǵa arnalǵan syzba albomy men túrli-tústi qıma qaǵazdary, jazý-syzýǵa arnalǵan quraldar men jelim jáne ózge de zattar salynǵan mektep sómkeleri tabystaldy.

Bul kómekti úılestirýge «jasotandyq» belsendiler de óz úlesin qosty. «Jas Otan» jastar qanaty Túrkistan oblystyq fılıalynyń tóraǵasy Janserik Jumannyń aıtýynsha, mundaı ıgi bastamalar aldaǵy ýaqytta da jalǵasyn tabady.