Túrkistanda «Mańǵystaýdyń qasıetti nysandary» atty kóshpeli kórme ashyldy

TÚRKІSTAN. QazAqparat – Túrkistandaǵy Qoja Ahmet ıAsaýı kesenesinde «Mańǵystaýdyń qasıetti nysandary» kóshpeli kórmesi ashyldy. Sharany «Áziret Sultan» memlekettik tarıhı-mádenı qoryq-mýzeıi men Mańǵystaý memlekettik tarıhı-mádenı qoryǵynyń uıymdastyrdy, dep habarlaıdy QazAqparat tilshisi.

Mádenıet jáne sport mınıstrliginiń «Rýhanı jańǵyrý» jáne «Tsıfrly Qazaqstan» baǵdarlamalary aıasynda uıymdastyrylǵan kórme Mańǵystaý óńiriniń kıeli, tarıhı jáne mádenı nysandary men jergilikti baǵaly qundylyqtaryn, tabıǵı landshaftary men muralaryn tanystyrý maqsatynda uıymdastyryldy.

Onda tarıhı sáýlet keshenderi jáne eskertkishter men keseneler, tarıhı jáne saıası mańyzy bar oqıǵalardyń oryndaryn halyq arasynda nasıhattaldy. Qoja Ahmet ıAsaýıdiń shákirti Shopan atanyń tarıhy men kesenesi jaıly ustaz eline keńinen tanystyrý da kózdelgen. Mańǵystaý óńiriniń tarıhı kórmesin «Áziret Sultan» memlekettik tarıhı-mádenı qoryq-mýzeıiniń dırektory Nurbolat Ahmetjanov ashyp, kórmege kelýshilerdi syr tunǵan ólkeniń tarıhyna boılaǵan aıtýly kúnmen quttyqtady.

Sharaǵa Mańǵystaý oblysynyń Mádenıet basqarmasy men «Mańǵystaý memlekettik tarıhı-mádenı qoryǵy» memlekettik mekemesiniń qyzmetkerleri, tarıhshylar men ǵalymdar, Túrkistan qalalyq ardagerler keńesiniń músheleri men «Áziret Sultan» memlekettik tarıhı-mádenı qoryq-mýzeıiniń qyzmetkerleri, jastar men mýzeıge kelýshi qonaqtar qatysty. Jıyn barysynda «Mańǵystaý memlekettik tarıhı-mádenı qoryǵy» mekemesiniń qyzmetkeri A.ıArıhanova jurtshylyqty kórmemen tanystyryp, qasıetti oryndardyń tizimine engizilgen 15 jalpyulttyq jáne 28 jergilikti mańyzy bar nysandar jaıly aqparattar berdi.

Kórme sońynda tarıhqa baı Mańǵystaý óńiri jaıly derekti fılm kórsetildi.