Túrkistanda Maǵjan Jumabaevtyń eskertkishi ashyldy

ShYMKENT. QazAqparat - Túrkistanda qazaqtyń áıgili aqyny Maǵjan Jumabaevtyń eskertkishi ashyldy. Aqynnyń óz atymen atalatyn №15 mektep-gımnazııasynyń aldynda boı kótergen tas músinniń ashylý saltanatyna qala ákimi Álipbek Óserbaev men ádebıet synshysy Qulbek Ergóbek, maǵjantanýshy-jazýshy Jarasbaı Súleımenov pen zań ǵylymdarynyń doktory, professor Beket Turǵaraev, Jazýshylar odaǵy tóraǵasynyń orynbasary Maraltaı Raıymbekuly jáne birqatar zııaly qaýym ókilderi qatysty, dep habarlaıdy QazAqparat tilshisi.

 

Sharada sóz alǵan qala basshysy ıgi iske muryndyq bolǵan jandarǵa barasha túrkistandyqtar atynan alǵys bildirip, atalmysh sharany rýhanı jańǵyrý jolyndaǵy qarymdy qadam bep baǵalady. Sondaı-aq, uly aqynnyń esimimen atalatyn mektep-gımnazııasyna jańa ǵımarat salynǵanyn, onyń materıaldyq-tehnıkalyq bazasynyń jańǵyrtylǵanyn jetkizdi. Budan soń «Soltústik Qazaqstan» gazetiniń bas redaktory, maǵjantanýshy-jazýshy Jarasbaı Súleımenov bul ıgi sharanyń mańyzynyń ereksheligin aıta kele, Maǵjannyń jalyndy jyrlarynyń eshqashan óshpeıtinin tilge tıek etti. Sondaı-aq, ol Soltústik Qazaqstan oblysy ákiminiń atynan mektepke kompıýterlik synyby syıǵa tartylǵanyn da atap ótti. Belgili zańger Beket Turǵaraev bolsa  keler jyly aqynnyń týǵanyna 125 jyl tolý merekesine oraı mektep ujymyna Maǵjan jyrlaryn jatqa aıtýdan baıqaý ótkizý jaıyndaǵy usynysyn jetkizdi. Al, demeýshilikti óz moınyna alatyndyǵyn aıtty. Jıynda belgili ánshi-sazger Saýranbek Eleýov Maǵjannyń «Túrkistan» óleńine jazǵan patrıottyq rýhtaǵy ánin oryndasa, Maǵjan Jumabaev mektep-gımnazııasynyń shákirtteri aqyn óleńderin úsh tilde jatqa aıtyp berdi.

 

Aıta keteıik, atalǵan eskertkishtiń bas demeýshisi «Ońtústik Jaryq» kommýnaldyq mekemesiniń prezıdenti Nábı Aıtjanov bolsa, músinniń avtory Qazaqstan Sýretshiler odaǵynyń múshesi, professor Azat Baıarlın.