Túrkistanda qurylysqa qajetti jerlerdi qaıtarý zań negizinde júrgizilýde

TÚRKІSTAN. QazAqparat - Túrkistan qalasynda qurylys nysandaryna qajetti jerlerdi qaıtarý jumystary zań negizinde júrgizilip jatyr. Bul týraly Óńirlik kommýnıkatsııalar qyzmetinde ótken brıfıngte qala ákimi Álipbek Óserbaev málim etti, dep habarlaıdy QazAqparat.

«Túrkistan qalasynyń bas josparyna sáıkes, qala qurylysy men sáýleti úsh baǵytta júrgiziledi. «Tarıhı aımaq» - 88,7 gektar, «Rýhanı-mádenı ortalyq» aımaǵy - 98 gektar, «Ákimshilik-iskerlik ortalyq» aımaǵy - 700 gektardy quraıdy. Osyǵan oraı, qurylys nysandaryna qajetti jerlerdi qaıtarý jumystary zań negizinde júrgizilýde», - dedi qala ákimi Álipbek Óserbaev.

Onyń aıtýynsha, qazirgi tańda 98 gektar jerdi quraıtyn ekinshi aımaq atalatyn «Rýhanı-mádenı ortalyqta» qajetti jerdi daıyndaý maqsatynda memleket qajettiligine 167 nysandy (13 kásipkerlik, 154 turǵyn úı) qaıtarý jumystary júrgizilýde.

«Atalǵan 167 nysanǵa akt toltyrylyp sýretke túsirilgen. Búgingi tańǵa 161 nysannyń baǵalaý jumystary tolyq aıaqtaldy. Qazir altaýyna baǵalaý jumystary júrgizilýde. Sondaı-aq, bul jumystardy memlekettik satyp alý zańyna sáıkes, konkýrstyń nátıjesinde nysandardy baǵalaý jumystaryn «Ekspo Otsenka» JShS júrgizdi. Baǵalaý jumystary bitken 161 nysannyń búgingi tańda 91 menshik ıesiniń kelisim berdi. Búginde turǵyn úı nysandaryn bosatyp, buzý jumystary bastalyp ketti. 13 nysan buzyldy. Al kelisimge kelmegen 40 nysannyń qujaty zańǵa sáıkes sotqa joldandy. Otyzǵa jýyq azamatpen kelisim jumystary júrgizilýde», - dedi Álipbek Óserbaev.

Sondaı-aq, «Ákimshilik-iskerlik ortalyqqa» túsetin 672 gektardy quraıtyn jer aýmaǵynyń búgingi tańǵa zań talaptaryna sáıkes, 470 gektary qaıtaryldy.

Aıta keterligi, nysan ıeleri berilgen baǵamen kelispese, óz taraptarynan kez kelgen lıtsenzııaly mekemege baǵalaý jasata alady. Nátıjesinde eki taraptyń baǵalaý nátıejeleri sotqa joldanyp, zań talaptaryna sáıkes sheshiledi. Sonymen qatar, kelispegen turǵyndarmen arnaıy ótinishteri boıynsha jumys jasaý úshin 2018 jylǵy 14-jeltoqsandaǵy №780 qala ákiminiń ókimimen 29 adamnan quralǵan komıssııa jumys jasaýda. Ol komıssııanyń quramynda memlekettik qyzmetkerler jáne jergilikti úkimettik emes uıymdardyń tóraǵalary men músheleri, depýtattar bar.

Zańǵa sáıkes memlekettiń muqtajy úshin jer qaıtarý jumystaryna jáne baǵalaý jumystaryna kelispegen turǵyndarmen birneshe ret túsindirý jumystary júrgizilgen.