Túrkistanda Qorshaǵan ortany qorǵaý kúnine oraı senbilik ótti

TÚRKІSTAN.QazAqparat – Túrkistan qalasynda Dúnıejúzilik qorshaǵan ortany qorǵaý kúnine oraı senbilik uıymdastyrylyp, memlekettik qyzmetkerler qala kóshelerin kúl-qoqystan tazartty. Barlyq basqarma qyzmetkerleri oblys ortalyǵyndaǵy demalys aımaqtarynyń aınalasyn abattandyryp, aǵash túpterin áktedi, dep habarlaıdy QazAqparat tilshisi.

Igi sharany oblystyq tabıǵı resýrstar jáne tabıǵat paıdalanýdy retteý basqarmasy men «Jasyl aımaq» mekemesi jáne Túrkistan oblysy boıynsha Ekologııa departamenti uıymdastyrdy. Sala mamandary bul jolǵy senbilik tabıǵat anany aıalaý men shahardyń tazalyǵyn saqtaý jáne óskeleń urpaqqa úlgi kórsetý maqsatynda ótkizilgenin aıtady. Olardyń sózinshe, óńirde jyl saıyn qorshaǵan ortany qorǵaý maqsatynda eldi mekenderdi jasyl jelekpen kómkerý jumystary turaqty túrde júrgizilýde. Búgingi tańda 778 ga jerde 404 myń dana kóshet otyrǵyzylyp, Túrkistan qalasynyń ekologııalyq ahýalyn jaqsartý úshin «Jasyl aımaq» pen «Jasyl beldeý» baǵdarlamalary aıasynda aýqymdy jumystar atqarylýda. Aımaqta sondaı-aq, kóktemde 1247 gektar jerde mádenı orman alqaby qurylǵan. Oblys ortalyǵyn kógaldandyrý úshin qajetti kóshettermen qamtamasyz etý maqsatynda 300 ga jerde orman pıtomnıgi ornalastyrylǵan. Ol jerde qazir 1030,5 myń dana kóshet ósirilýde. Aıta keterligi, oblystyq tabıǵı resýrstar jáne tabıǵat paıdalanýdy retteý basqarmasyna qarasty mekemelerdiń pıtomnıkterinde 7,1 mln-ǵa jýyq ártúrli aǵash-buta ósimdikteriniń kóshetteri kútip-baptalýda.