Túrkistanda koronavırýspen kúreste erekshe kózge túsken medqyzmetkerler marapattaldy

TÚRKІSTAN. QazAqparat - Túrkistan oblysynda COVID-19 indetimen kúres kezinde erekshe kózge túsken medıtsına salasynyń qyzmetkerleri marapattaldy, dep habarlaıdy QazAqparat.

Aımaqtyń bas dárigeri Marat Pashımov óńirdegi epıdemıologııalyq jaǵdaıdyń turaqtalýyna súbeli úles qosqan aq halattylarǵa alǵys aıtyp, qýanyshymen quttyqtady.

Saltanatty sharada oblystyq klınıkalyq aýrýhanasynyń dárigeri Vıacheslav Tsoı – úzdik dáriger, Túrkistan qalalyq ortalyq aýrýhanasynyń meıirbıkesi Elmıra Seıitova – úzdik meıirbıke atandy.

Al, №1 oblystyq perınataldyq ortalyǵy – úzdik medıtsına mekemesi dep tanyldy.

«Álemdi ábigerge salǵan koronavırýs aýrýy elimizge de kóp qater týdyrdy. Ótken jyl jalpy halyqqa aýyr bolǵany belgili, ásirese densaýlyq saqtaý salasynyń qyzmetkerlerine qıyn boldy. Osy qıyndyqty el bolyp jeńe bildik. Bul meniń ǵana marapatym emes, barlyq áriptesterime kórsetilgen qurmet dep bilemin. Osy bir eńbegimizdi elep, meıreıimizdi asyryp otyrǵan Qoǵamdyq densaýlyq basqarmasyna mol alǵys aıtqym keledi. Endi mundaı jaısyz jaǵdaılar bolmasa eken dep tileımin», – deıdi Túrkistan qalalyq ortalyq aýrýhanasynyń meıirbıkesi E.Seıilhanqyzy.

Aıta keteıik, óńirde densaýlyq saqtaý salasynda jalpy 23 585 maman jumys isteıdi. Qazirgi tańda oblysta 88 naýqas koronavırýs aýrýyna baılanysty em qabyldaýda.