Túrkistanda kópbalaly medıtsına qyzmetkerlerine kómek kórsetildi
Tuńǵysh prezıdent kúni qarsańynda oblystyq densaýlyq saqtaý uıymdary jumyskerleriniń kásipodaǵy aýdan-qalalardaǵy aýrýhanalarǵa baryp, medıtsına qyzmetkerlerine eń qajetti degen azyq-túlik sebetterin taratty, dep habarlaıdy QazAqparat tilshisi.
Oblystyq qoǵamdyq densaýlyq basqarmasy men medıtsına qyzmetkerleriniń jergilikti kásipodaǵy birlesip uıymdastyrǵan qaıyrymdylyq shara Túrkistan qalasynda ótti. Onda medıtsınalyq mekemelerde jumys isteıtin kópbalaly jáne jalǵyzbasty analar men turmys deńgeıi tómen qyzmetkerlerge eń qajetti degen azyq-túlik úlestirildi.
«Men jalǵyzbasty anamyn, alıment almaımyn. Úkimetten de kómek almaımyn. Tek jumystan aılyq alamyn, ol aılyqpen balalarymdy asyraý qıyn. Úlken qyzym stýdent. Kásipodaqqa rahmet úlken, bizge qoldaý kórsetip, munyń ózi bizge úlken kómek. Muny da ala almaıtyn kezimiz bolady keıde», - deıdi jalǵyzbasty ana Móldir Sársenbaeva.
Sondaı-aq, kásipodaq qyzmetkerleri bul kúni Túrkistan qalasyndaǵy medıtsına kolledjiniń stýdentterine arnaıy stıpendııa taǵaıyndap, sertıfıkattaryn tabystady. Endigi jerde oqýda ozat jáne belsendi jastarǵa bir jyl kóleminde stıpendııa aýdaryp otyratyn bolady.
Aıta keteıik, medıtsına salasynda eńbek etip júrgen árbir qyzmetkerdiń turmystyq jaǵdaıyna beı-jaı qaramaıtyn kásipodaq uıymy aǵymdaǵy jyly baspanasy órtengen jáne óndiristik jaraqat alǵan qyzmetkerlerge de materıaldyq kómek kórsetti. Al, pandemııa kezinde naýqastardy emdeımin dep, ózderi baqılyq bolǵan dárigerler men medbıkelerdiń, tazalyq qyzmetkerleri men júrgizýshilerdiń otbasylaryna 100 myń teńgeden materıaldyq kómek berdi.
«Medıtsına uıymdaryndaǵy ózimizdiń múshelerimizdiń kópbalaly, áleýmettik jaǵdaıy tómen otbasylarynyń jaǵdaıy týraly málimetter jınaý arqyly olarǵa jyl saıyn azyq-túlik sebetterin taratyp otyramyz. Odan bólek, turmysy tómen otbasylardyń balalaryna mektep formalaryn taratý maqsatynda «Mektepke jol» aktsııasyn da uıymdastyryp otyramyz»,- deıdi medıtsına qyzmetkerleri jergilikti kásipodaǵynyń tóraǵasy Sáken Katbaev.